Richard Arends tabata envolvi cu Refineria di Aruba, RDA, tanto den su capacidad di persona como pa medio di su compania Horizon Consultants. Y su papel a keda scrutina pa Forensic Services Caribbean, FSC kende a mustra a trata di haya comentario di Richard Arends, pa haya un bista mas completo di tur e desaroyonan.

Segun Arends, e representante di accionista di e compania a nombra su persona como apoderado y a dun’e e autorisacion pa den e periodo di October pa November 2016, valida transaccion di banco despues cu e director a ehecuta esakinan y firma e transaccionnan aki hunto cu e director. E autoridadnan aki tabatin unicamente relacion riba pagonan cu mester a haci y no a base di acuerdonan cu ta crea obligacion pa RDA. E autorisacionnan tabata sosode despues cu a presenta e documentonan necesario.

Segun Arends na FSC, e autoridad cu el a ricibi pa firma no tabata sali di un acuerdo di labor of un funcion relaciona na esaki. “Sr. Koolman kende tabata apunta pa bira director y ami a haci e preparacionnan pa habri un cuenta pa un compania RDA cu ainda mester a lanta.” Richard Arends a bisa cu el a haya e apoderacion di e accionista pa firma. Y despues di 30 di November 2016, e no por a valida ningun transaccion mas. E tarea aki a pasa pa Sr. Glenn Geerman cu a keda autorisa pa firma riba cuenta di FMSA y RDA pa e periodo di 6 di December 2016 te cu 3 di Februari 2017. Geerman di otro banda tabata Director di e compania Gagusol Consultancy VBA, y tabata brinda servicio na RDA y FMSA for di 2016 te cu 2018.

FSC no por a haya un specificacion di oranan cu Horizon Consultancy Group a dedica na RDA, tampoco locual Sr. Arends como persona a contribui, basa riba e facturanan cu a paga.

Segun e contrato cu FSC a haya den e e-mail di ex Director di RDA, Alvin Koolman, Richard Arends a keda nombra dia 1 di November 2016 como Chief Financial Officer, CFO, como tambe Director Asuntonan Financiero y Huridico. Mester bisa cu e tempo ey tambe Sr. Arends tabata Minister den Gabinete Mike Eman II.

E contrato ta papia di un salario di 22.375 mil florin mensual, un compensacion di vakantie di 1/12 di e salario anual, compensacion na comienso di aña di 1/8 di salario anual, ademas di compensacionnan pa gasto di telefon, representacion y transporte, ademas di derecho di un auto di compania.

Sinembargo, FSC a constata tambe cu ningun momento a haci pagonan na Sr. Arends como CFO. Es mas, Richard Arends a bisa na Juli 2020 cu e contrato laboral entre su persona y RDA nunca a concretisa y cu e nunca a asumi e posicion, como tal nunca por a keda inscribi na Camara di Comercio como CFO di RDA. E representante di e accionista actual, cu ta Gobierno di Evelyn Wever Croes a confirma esaki tambe. Mientrastanto Richard Arends a entrega un carta oficial na mr. Wever Croes pa formalmente termina e contrato laboral.

Bon Dia Aruba lo sigui analisa e documento amplio produci pa FSC, cu a keda circula den fin di siman via medionan social y ta duna un ilustracion di e gastonan haci, sin cu tabatin contrato pa nan, incluso pa e compania cu awor ya no ta existi esta Tera Group.