Natalie Geerman director di Avond Mavo Aruba a sigura cu un total 102 alumno loke ta representa un 62% di studiantenan a gradua e aña aki y ainda tin algun di nan cu tin chens y cu mañan nan lo haya sa cuanto alumnonan extra lo por gradua.
El a sigura cu e interes pa Avond Mavo ta hopi grandi, cu personanan tin interes pa sigui studia como di esnan cu a cay afo den dia of esunnan cu pa hopi aña kier bay scol back.
Ademas, el a expresa cu e aña aki tambe tin e oportunidad di sigui studia y por inscribi te mañan dia 16 di juli , Geerman a menciona cu mes cos cu aña pasa, nan inscripcion ta bay 100% via online.
Di e lesnan el a enfatisa cu pa motibo cu nan ta traha cu adulto nan haya e noticia cu tambe nan por bay fisicamente na scol cu mas alumno den un lokaal pa asina brinda e opcion pa e studiante cu por scoge entre haci’e via online of haci’e fisicamente, aunke el a sigura cu nan no sa con e situacion di Covid-19 ta bay sigui y nan tin cu tene na cuenta cu esey.
Ademas, el a expresa cu tin un cambio den e proceso di inscripcion cu ta dirigi pa alumnonan cu a keda sinta un of dos biaha, por ehemplo na leerjaar 3 dinsdag school y kier bay cerca Avond Mavo nan por bay laga e studiante bay over na leerjaar 3 pa examenklass si e studiante tin un pakete cu ta suficiente pa haci esey.
Di esey, el a splica den derdeklaas nan tin alumnonan cu ta haya hopi vak y cerca Avond Mavo nan tin e chens di scoge nan pakete, cu por ta cu kier keda cu seis of shete vak y esey ta suficiente, e ora ey e studiante por bay examenklass y “e chens pa e alumno por make it ta grandi”, segun loke Geerman a declara.
Esaki ta nifica cu alumnonan di MAVO 3 cu no a bay over pa evalua e puntonan, nan por bay over den e area aki.
Asina mes, el a bisa cu tur aña nan ta haci analisis y 62% di loke nan a haya e aña aki ‘ta halto’ manera el a afirma, pa motibo cu for di añanan pasa nan tabatin mas di 30% so.
“Nos tin cu tene na cuenta cu e alumnonan di nos tin hopi obstaculo, nan ta traha, nan tin famia, tin yiu, tin hopi cos cu nan a pasa caba den nan bida y esey ta e motibo cu nan ta end up cerca nos na Avond Mavo”, Geerman a specifica.
Pa alumnonan di EPB, Geerman a destaca cu si pa varios aña e studiante no a bay scol mas of a keda sinta por ehemplo den examenklass cu no a logra haya nan diploma, tambe por acerca na Avond Mavo den leerjaar 2 pero esaki ta bay cu un contract.
Asina mes, el a splica cu pa e grupo di docentenan nan tin dos vacature, un dirigi pa geschiedenis y otro pa aardrijkskunde por si algun persona tin interes di traha pa Avond Mavo cu ta un trabou part time pa manda nan CV na directie@avondmavoaruba.com.
Avond Mavo ta dirigi pa esunnan cu tin mas di 16 aña, Geerman a duna di conoce cu na e momentonan aki nan tin un studiante cu tin mas di 60 aña cu ta bay cuminsa studia, loke ta nifica cu no tin limite di edad pa studia na Avond Mavo.
