Minister di Asuntonan Economico, Comunicacion y Desaroyo Sostenibel, Geoffrey Wever ayera mainta a informa cu e for di awe gasolin ta bay baha cu 13.1 cen unda cu e prijs pa liter ta bay keda na 2 florin cu 55 cen loke ta representa un reduccion di 4.9%.
Pa loke ta trata diesel, e ta bay baha cu 10.5 cen hibando e prijs na 2 florin cu 59 cen pa liter cu un reduccion di 3.9%.
E prijsnan aki ta drenta na vigor e dia di awe unda segun minister Wever a menciona, e desaroyonan internacional a demostra caba cu posiblemente pa e periodo nos dilanti e prijs ta bay subi, bari di petroleo ta na 90 dollar pa cada bari y recientemente OPEP a anuncia cu ta bay reduci e produccion di petroleo cu mas o menos dos miyon di bari di petroleo pa dia loke a causa e aumento di prijsnan pero “pa e periodo venidero, proximo cuater siman e prijsnan ta bay wordo reduci”, minister Wever a señala.
Manera a wordo anuncia esaki ta debi na desaroyonan internacional y cu Aruba ta importa tur producto for di afo y p’esey e ta wordo confronta cune.
Biahe pa Surinam
Ademas, el a expresa cu awe e ta saliendo pa Surinam den un biahe di trabou unda lo tuma un conferencia di Nacionnan Uni pa Caribe y Latino America caminda cu den e dos dia di agenda ta bay discuti e establecimento di un fondo di paisnan di Caribe y Latino America pa absorba temanan como por ehemplo, e pandemia di Covid-19, pa asina ey e paisnan den region por bira mas resiliente y prepara mas miho pa un situacionnan externo asina.
“Mayoria di paisnan den region tin e mesun complicacionnan cu nos tin, importando asina hopi producto y wordo confronta cu desaroyonan internacional sin cu por controla esey y pa e motibo ey a dicidi di pone den agenda e tema aki, mi ta considera interesante e biahe aki pa por reuni cu partnertnan di e region pa wak con nos por yega pa establece un fondo asina”.
Manera nos sa ora pandemia a dal Aruba y mundo henter por a wak cu akinan no tabatin un sistema pa absorba e tipo di efectonan externo, “30 aña pasa nos no a cuminsa cu un programa di spaar pa ora cu cosnan asina sucede nos ta bon prepara”, el a bisa.
Di su parti, el a señala cu Aruba kier participa den dialogo ey y den negociacionnan pa wak con Aruba tambe por beneficia y participa den un fondo asina.
Como minister di Desaroyo Sostenibel, el a trece dilanti cu e ta responsabel pa trece dilanti y promove e SDG’s na Aruba y pa e motibo aki e agenda di su biahe tambe ta duna contenido na esey, pa participa dos dia den e conferencia aki.
