September di aña pasa ariba nan pagina oficial di Facebook, DOW a anuncia un otro proyecto cu lo tuma luga den e area di Palm Beach, pa esaki, nan a informa cu dialuna 22 di april e proyecto di reconstruccion di caminda na High Rise fase 1 lo cuminsa.
E prome parti lo ta e reconstruccion cu lo ta e area dilanti hotel Riu Antilla cu segun nan, lo tin un duracion di 7 siman y automobilistanan lo mester desvia riba avenida Nelson O. Oduber, tambe lo pone drenahe nobo y ductonan di awa preto nobo bou caminda.
Na september di aña pasa, nan tambe a informa cu e di dos parti ta mesun tipo di trabounan cu ta wordo realisa den e prome parti, pero esaki lo ta entre South Beach y e hotel Holiday Inn. E di tres parti ta encera reconstruccion di e wandelpad y trottoir entre Riu Antilla te cu Holiday Inn.
DOW a informa cu inicialmente e plan tabata pa tene destaho publico aña pasa y cuminsa e cu e trabaonan di e prome parti y caba cu esaki pa final di aña, pero nan a agrega cu esaki por a logra solamente si no tabatin retraso den e proyecto pa motibo di awasero of materialnan cu lo mester bestel di afo.
Nan a splica cu teniendo na cuenta na unda e trabaonan mester tuma logra, esta e area di High Rise, materialnan cu mester bin di afo y probablemente retraso pa motibo di awasero, nan a tuma e decision di tene destaho y otorga e trabou e aña pasa, pero trabaonan pa e proyecto ta bay cuminsa awor.
J.E Irausquin Boulevard lo ta accesibel solamente pa trahadonan y turistanan yega na nan destinacion, manera nan a anuncia.
Pa esaki, algun ciudadano concerni riba rednan social a señala cu “ta spera cu no ta solamente pa trahado di hotel pero tambe pa trahadonan cu ta envolvi cu turismo cu mester yega na e turista? Of nos mester pidi un permiso special?”
Potretnan cortesia di DOW ta ilustra e desviacion cu ta bay tin y ta pidi na automobilistanan pa tene na cuenta cu esaki.
