A traves di un publicacion riba e red social Facebook, e page “Aruba” ayera a publica cu for di 1 juli 2024 lo cuminsa cobra na bishitantenan cu lo bin Aruba e cifra di 20$ di Sustainability Fee, un informacion cu a causa un conmocion riba social media caminda turistanan a cuminsa comparti y reacciona riba e informacion aki.

“For di 1 juli 2024, Aruba ta bay implementa un tarifa di sostenibilidad di 20$ pa bishitantenan cu lo yega na isla via aereo. E tarifa aki ta bay apoya un serie di proyectonan destina na mehoracion y esfuersonan haci pa sostenibilidad den e isla. Esnan cu no ta obliga di paga e tarifa aki ta: residentenan, muchanan menor di 8 aña, bishitantenan cu a paga e tarifa caba anteriormente den aña aki, studiantenan di Aruba cu por demostra cu nan ta studiando den un institucion educativo stranhero y esnan residente den ultimo 8 aña. E tarifa di sostenibilidad ta bay ser cobra a traves di e plataforma online (ED) di mientras ta completa e carchi pa drenta Aruba.” E comunicado a señala.

Te ayera e publicacion tabatin mas cu 200 comentario y 100 re-share, tin di nan a cu a comenta cu nan a haya bon iniciativa aki manera “Mi ta confia cu Gobierno di Aruba lo duna un bon uso na esaki na beneficio di e isla, mi tin 35 aña bishitando Aruba y mi ta spera cu costonan lo no subi.”

Entre otro, tabatin algun cu no ta di acuerdo y a skirbi “Dicon no ta bay cobra e construccion di miles di miyon dollar cu ta construi den exceso pa paga pa mehora infrastructura di isla y no personanan cu ta doñonan cu a bin Aruba pa añanan y gasta miles di dollar pa aña pa nan paga e tarifa aki? Esaki ta sucede ora no tin hende honesto manehando e isla.”

Pa otronan e informacion no tabata mucho duidelijk y a puntra dicon no ta duna contexto riba “pakico ta existi un Sustainability Fee? Kico ta bay cubri exactamente? Manera problemanan importante como awa di riool y sushi den e isla. Transparencia ta funciona y mayoria di turistanan ta bay paga cu gusto si nan sa cu nan placa ta bay ser destina na un gran causa den e isla.”

Ademas, a sigura cu “ta birando comercial manera otro luganan bunita y eventualmente e hendenan no ta bay bishita Aruba mas y esey ta bay perhudica e hendenan cu ta biba eynan. Mi no tin ni un problema pa paga 20$ pero mi ta spera cu esey lo sirbi pa yuda e bestianan.”

Pa algun hende local e noticia aki tampoco a cay den bon tera indicando cu mester “stop di estafa e turistanan, algun resortnan ya caba ta cobra pa palapa cu ta publico, ta basta cu ladronicia di nos turistanan. Ladron nan den bachi cu ta broma tur luna cu a genera x amount, pero Unda e cen ta bay? Den fiesta, salario, den saco, faborece friends and family???”