Un grupo di studiantenan di Universidad di Aruba di e facultad di Hospitalidad y Turismo lo ta organisando den fin di siman ‘Foodie Festival’, un evento organisa cu e meta pa recauda fondo pa Stichting Casa Cuna Progreso.

Bryan Barrero, presidente di e ekipo organisador a splica durante un conferencia di prensa cu como studiantenan di Universidad di Aruba nan mester realisa un proyecto di scol unda cu nan tin cu haci un evento di fundraising pa yuda un fundacion den comunidad cu ta non profit y como ekipo nan a scoge Stichting Casa Cuna Progreso como e fundacion cu nan lo yuda.

“E stichting aki ta hopi cerca di nos curason pasobra nan ta traha specialmente cu muchanan di 0 pa 8 aña cu ta maltrata, of abusa of neglisha y tambe pa esey nos a tuma e iniciativa pa yuda e stichting aki pasobra nos sa cu e muchanan ta futuro di nos pais y nos kier inverti den e muchanan”, Barrero a indica.

Foodie Festival lo tuma luga diasabra dia 7 di mei for di 7or di anochi te cu 11or di anochi ariba Plaza Nicky Habibe y Barrero a remarca cu tur fondo cu wordo recauda lo bay automaticamente pa Stichting Casa Cuna Progreso. E concepto di evento aki, el a menciona, ta uno di un food truck festival caminda lo tin diferente trucknan di cuminda como tambe dessert trucks, un kids corner y artistanan local cu lo ta ofreciendo nan productonan e anochi ey.

Segun Barrero a indica e meta inicial pa recauda ta cinco mil florin, pero si pasa e cantidad aki tambe lo ta mas cu welcome.

“Nos kier yega na tur hende, di esun mas chikito pa esun mas grandi y lo bay tin algo pa tur hende. Nos tin algo pa e muchanan, nos tin algo pa e mayornan, nos tin algo pa tur hende y tambe lo tin hopi sorpresa”, Barrero a agrega.

Sheelah Arends, secretaria di e ekipo, a splica cu na momento cu nan a bin cu e idea nan tabata kier a haci algo innovativo, aunke cu e proyecto a wordo designa pa scol toch nan a tum’e di curason pa haci e evento uno exitoso. El a indica cu lo tin diferente sorpresa durante e evento. Pa loke ta e parti di entretenimento Arends a menciona cu lo tin varios DJ reconoci aki na Aruba cu lo presenta, entre otro Nutzbeatz.

El a subraya tambe cu Foodie Festival lo ta e prome festival cu lo haci uso di e tram manera un escenario. “Esaki ta bay ta algo innovativo algo cu nunca a yega di pasa. P’esey nos ta anima henter pueblo di Aruba pa bin y experiencia e evento aki”, Arends a expresa.

Pa loke ta e foodtrucknan cu lo t’ey presente, Arends a indica cu hopi di e trucknan faborito di Aruba lo t’ey presente, entre otro Chalo, Candela y El Mexicano. Y lo tin tambe truck di dessert Piece of Cake truck y Poffertjes.

Pa sigui cu e recaudacion di fondo pa Stichting Casa Cuna Progreso, e grupo di studiante a dicidi di haci un rifa, adicional na e evento mes pasobra segun Arends a splica nan no ta bay cobra un suma specifico pa entrada na evento, pero e entrada lo ta un donacion di curason di cada persona. “Kico cu bo tin, si ta cinco cen, 10 florin, kico cu ta lo tin un persona para dilanti na entrada cu un caha y pa por drenta mester duna un donacion”, el a agrega.

Arends a enfatisa cu e donacion lo mester ta monetario solamente, nan no lo ta aceptando donacion di cuminda of paña.

Por ultimo, Barrero a extende su invitacion na pueblo di Aruba pa asina contribui na e bunita causa aki. “Mi kier invita henter pueblo di Aruba pa nos uni y pone man na curason pa nos muchanan di Stichting Casa Cuna Progreso pasobra si nos inverti den nos muchanan ta e futuro di nos pais, kiermen si bo inverti den nan bo tin futuro sigura. P’esey nos ta invita bo pa dia 7 di mei, diasabra awo, 7or di anochi na Plaza Nicky Habibe pa disfruta di un anochi ameno y tambe yuda e stichting aki”, el a finalisa.