Informacion cu a drenta na Bon Dia Aruba ta indica cu diferente instancia y fundacion – cu ta forma parti di e social crisis plan – ta bin hayando carta, pa informa nan cu te december gobierno lo por paga pa e servicio, entre otro di extra profesionalnan cu a wordo tuma pa atende cu e demanda grandi di casonan di dimension social.
Prome Minister Evelyn Wever-Croes a bisa – den su ultimo conferencia prome cu a biaha Hulanda diamars ultimo – cu e social crisis plan ta keda un fondo separa. Esaki contrario na loke Hulanda kier pa hink’e den e gasto di personal. Sinembargo Premier Wever-Croes a bisa cu gobierno por inclui e gasto di e social crisis plan den e gasto di presupuesto 2020, pero si nan ta haci’e, Hulanda mester kita un eventual ‘aanwijzing’ (instruccion di Reino) for di mesa.
Como gobierno nan ta kere cu Minister di Asunto Social, Glenbert Croes, mester tin e fondo separa pa atende cu e problemanan social di comunidad. Pero e plafond cu nan tin pa gasto di personal ta keda 476 miyon den e presupuesto 2020. E suma aki no ta solamente pa pais Aruba, caminda e suma destina pa e social crisis plan no lo ta ariba dje, sino den dje, el a declara. Pero un eventual ‘aanwijzing’ mester wordo kita for di mesa.
E asunto aki ainda ta den deliberacion cu Hulanda, y Premier Wever-Croes a pidi pa pone den e agenda di e reunion cu e lo bay tin den Conseho di Minister di Reino mañan.
