Fondo di FDA a conoce su fin y AIB bank ta sigui normal

AIB bank (Aruba Investment Bank) tabata responsabel di administra e fondonan di FDA pa casi 18 aña. E fondo aki a conoce su fin y e ultimo 16 miyon cu a resta a wordo re aloca pa varios proyecto cu a keda aproba den Parlamento di Aruba recientemente.

Director di AIB bank, Frendsel Giel a expresa su satisfaccion ya cu pa medio di e fondo aki hopi proyecto a wordo realisa pa pais Aruba. Nan tabata proyecto di diferente indole y pa diferente sector, el a laga sa.

Nan a cera e fondo di FDA totalmente e aña aki. Sr. Giel ta spera cu den e proximo añanan lo por bini cu un fondo igual. Sinembargo e ta clarifica cu e establecimento di un fondo asina no ta den man di AIB bank. E ta recorda cu e creacion di FDA tabata un iniciativa tanto di e gobierno di Aruba como esun di Hulanda, ya cu tur dos a aporta na e fondo aki.

E rol di nan entidad bancario tabata esun di maneha e fondo aki di un manera responsabel den cuadro di acuerdonan cu ambos partido a cera cu otro. Ta p’esey mes aworaki nos ta kere cu e fondo aki tabatin un meta bon. E tabatin tambe un bon proposito, el a declara na Bon Dia Aruba.

Sr. Giel ta spera cu lo por reflexiona riba tur loke a wordo logra cu e fondo di FDA durante casi dos decada. Pa asina continua eventualmente cu un fondo similar den futuro cu por realisa proyectonan den tempo y inversion acorda. Tambe cu e ta beneficioso pa e pais Aruba.

Na e momento aki e ta reitera cu e asunto di bin cu otro fondo no ta den man di nan organisacion bancario. Sino cu e ta den man di e gobiernonan, ya sea di Aruba of Hulanda, of gobiernonan den futuro.

AIB bank
E ta bisa cu aunke FDA tabata un fondo importante administra pa AIB bank, despues cu e fondo aki a conoce su fin, e entidad bancario aki ta sigui normal.

“Nos ta un institucion independiente”, el a bisa. Nan ta consisti di accionistanan priva plama den varios sector. Te hasta persona individual tin accion den AIB bank. Como institucion independiente nan ta kere tambe cu e banco tin un meta. Nan meta ta uno economico social. Segun su director, nan ta bin cumpliendo esaki den tur sector di nos pais.

E banco aki ta bin dunando su servicio pa 30 aña caba den nos comunidad. Dia 7 di october awor nan ta celebra nan di tres decada di hubileo di existencia. Pues e ta kere cu e banco mes lo sigui desaroya y realisa proyectonan pa bienestar di economia di Aruba.