ORANJESTAD – Dia 9 di mei ultimo Camara di Comercio y Industria (KvK) a ofrece diferente sector comercial e oportunidad pa por ta presente y atende e seminario enfocando riba reconstruccion di Sint Maarten y di e forma aki brinda sosten na e causa.
E webinar a wordo transmiti den colaboracion cu islanan den Reino cu a uni pa yuda Sint Maarten. Un total di 300 persona representando negoshinan di Sint Maarten, Corsou, Boneiro y Aruba a sigui e webinar interactivo aki. Den un sala completamente yen cu companianan di diferente sector entre nan companianan den construccion, ingenieria, material, medio ambiente y maneho di proyectonan a elabora riba e topico via un webinar. VNO ta fungi como e enlace pa facilita e ayudo y colaboracion entre Hulanda y islanan den Reino Hulandes.
E “National Recovery Program Bureau” (NRPB) di e gobierno di Sint Maarten a establece un plan di reconstruccion, e National Recovery and Resilience Plan, pa ehecuta e proyectonan di reconstruccion di Sint Maarten. E plan ta wordo ehecuta cu fondonan di “Sint Maarten Recovery Reconstruction and Resilience Trust Fund”. E fondo aki tin un suma di $550 miyon di parti di gobierno Hulandes. World Bank tin supervision riba e suma di e fondo.
Sra. Sonja Velthuizen, directora di KvK a hiba palabra di bon bini na tur esunnan presente pa e webinar y despues a bay over na e webinar cu a wordo presenta den auditorio di KvK. Asina tambe a pasa palabra pa sr. Erwin Arkenbout, representante di Hulanda pa di e forma aki tambe start cu e webinar interactivo riba reconstruccion di Sint Maarten. Siguientemente sr. Carlos Lago cu ta Senior Procurement Specialist di World Bank a duna un presentacion encuanto “Doing Business with the World Bank”. Despues di e presentacion di sr. Lago a duna palabra na Commerijn Plomp, Jules van Son y Nienke Meijer di “Rijksdienst voor Ondernemend Nederland“ (RVO) kendenan a duna un presentacion riba “Working with the World Bank” unda a elabora riba e oportunidadnan pa sector priva den e contexto di un trust fund pa reconstruccion di Sint Maarten. Por ultimo a hiba palabra sr. Claret Connor di “National Recovery Program Bureau” (NRPB).
Despues di e ultimo presentacion a duna e publico presente e oportunidad pa haci algun pregunta den un sesion di Q&A. E webinar a clausura cu un anuncio di parti di Michelle Keane y Doekle Wielinga kendenan alabes a informa cu e siguiente sesion lo bay tuma luga den luna di juni 2019. E representantenan di National Recovery Program Bureau, WB y RVO lo bay t’ey na Aruba y asina por sigui elabora y traha riba e posibilidadnan na participa na e bunita oportunidad aki pa yuda restructura y reconstrui Sint Maarten.
Un danki ta bay na tur e companianan cu a participa na e webinar y ta pidi pa keda pendiente di KvK su website www.arubachamber.com y tambe su Facebook pa mas informacion encuanto e siguiente sesion.
