Gobierno a duna prioridad pa renoba e edificio di Biblioteca Nacional Aruba na San Nicolas. Asina tres minister presente dilanti di e edificio aki: sra. Michelle Hooyboer-Winklaar, sr. Otmar Oduber y sr. Mike de Meza a anuncia dilanti di prensa ayera mainta.
E balor di e proyecto aki no a wordo bisa, ya cu ainda mester tuma luga prome e proceso di destaho publico. Ta wordo spera cu eventualmente aki dos luna e proceso aki lo bin cla y lo wordo anuncia cual compania a gana e bid.
Prioridad y necesidad
Apesar cu e lista ta largo di edificionan cu mester di atencion, gobierno a prefera di duna prioridad na e renobacion di biblioteca su sede na San Nicolas, mirando su importancia no solo academico sino di integracion comunitario.
“Esaki no ta simplemente un edificio unda bo ta haya buki. Pero sino un edificio unda comunidad henter di San Nicolas ta bini, hobennan y adultonan..”, asina minister di Enseñansa, sra. Hooyboer-Winklaar a bisa.
E decision di renoba e edificio aki ta producto di un deliberacion basta largo den seno di conseho di minister pa yega na e fondo necesario pa atende cu e necesidad aki teniend na cuenta e presupuesto masha preta di gobierno.
Minister Hooyboer-Winklaar a gradici su coleganan cu a sostene e proyecto aki, apesar cu e no tabata riba e lista di prioridad. Tur tres mandatario a resalta e importancia di un proyecto asina pa nos muchanan y hobennan di scol, pero tambe pa nos adultonan.
El a laga sa cu ministernan a pone cabes hunto pa busca un solucion pa yega na e fondo necesario pa renoba e edificio di biblioteca na San Nicolas.
Fondo
E fondo a bin di loke operacion di aeropuerto a produci durante 2015. Minister encarga cu aeropuerto, Otmar Oduber a expresa cu mirando e desaroyo di turismo durante aña pasa caminda aeropuerto di Aruba a mustra un entrada adicional di casi 4 miyon florin adicional di loke a wordo planifica.
Tur minister a bay di acuerdo pa e fondo adicional aki lo wordo reubica primeramente pa biblioteca San Nicolas. Tambe conseho di minister a dicidi di haci uzo di un suma di e fondo adicional aki pa brandweer. Nan lo kier cumpra ekipo pa cuerpo di brandweer, ya cu pa hopi aña nan colega di Husticia, sr. Arthur Dowers tabata boga pe.
Minister Oduber ta sumamente contento, ya cu e proyecto aki ta demostra un biaha mas e “team work cu tin den e gobierno aki”. El a bisa cu actualmente henter un renobacion ta tumando luga den e area aki di San Nicolas. E ta un plan cu a inicia fei 2013 caminda e decision a cay di haci di San Nicolas un ciudad di cultura y di herencia cultural cu un interes turistico.
“Nos tin e fondonan suficiente. Naturalmente bo tin cu bay destaho publico”, el a bisa. E ta compronde fei su colega Hooyboer-Winklaar cu DOW a haci su analisis di cuanto nan ta calcula cu e proyecto di renobacion di e biblioteca San Nicolas ta bay costa.
Na final e mandatario a bisa cu e fondo ta suficiente pa “cumpli y cubri” pa por renoba biblioteca San Nicolas completo. Tambe pa Brandweer lo haya parti di e fondo menciona unda mester cuminsa un proceso di cinco aña pa nos aeropuerto por cumpli cu tur regla internacional tambe.
