(BES-reporter) – Periodistanan investigativo, Lukas Kotkamp y Daniel van Kessel di e organisacion di periodismo investigativo Follow The Money ta bezig durante varios siman caba, purbando di identifica e compania- y individuonan responsable pa e tugboat cu a kenter cerca di Tobago mientras tabata transporta diesmiles di bari di azeta.
Documentonan ta sugeri un historia complica di doñonan, involucrando Star Goods Petroleum y varios entrepreneur Dominicano. E doñonan ta parce di ta haciendo esfuersonan pa no keda identifica, esaki mirando un cantidad di compania, trust office y frontmen.
Tanto Bonaire como Trinidad & Tobago kier pa e doñonan di e barco en cuestion para responsable pa e daño causa na e naturalesa di e dos isla. Expertonan ta pronostica cu ta bay ta un reto pa haya e doño pa asina pon’e para responsable.
E dos periodista ta conclui den nan articulo cu a pesar di acuerdonan internacional, ta keda duda si ta bay logra algun dia haya compensacion pa e daño ambiental cu a sufri a consecuencia di e oilspill. E oilspill aki tambe ta afectando costa di Aruba, manera CMO a indica.
Potret di STINAPA Bonaire.
