Den respuesta na publicacionnan recien di e brasa Ehecutivo di Merca, relaciona cu e aplicacion di tarifa secundario riba paisnan cumprando azeta of derivadonan di azeta for di Venezuela, Fuels Marketing & Supply Aruba N.V. (FMSA) ta clarifica cu e compania no ta cumpra ningun azeta of combustible for di Venezuela.
FMSA, ta un compania propiedad di Refineria di Aruba cu ta encarga di importa petroleo y gasolin pa Aruba, a clarifica esaki a traves di un comunicado di prensa.
Segun e compania, Aruba a ricibi un solo cargamento na februari 2024, bao di e eliminacion general di sancion cu a keda acorda den e Acuerdo di Barbados (Regulacion di Sancion di Venezuela 31 CFR, parti 591, Licencia General No. 44). Nan ta aclara cu adicionalmente, Aruba a obtene un licencia OFAC for di Departamento di Estado Mericano pa heavy fuel oil (HFO). Sinembargo, no a usa e licencia aki pa motibo di preocupacion pa e confiabilidad di e suministro relaciona cu e mezcla specialisa di HFO rekeri pa WEB.
Ademas, e compania a recorda cu desde prome cu aña 2020, tur combustible limpi importa pa Aruba (esta gasolin, diesel/ULSD y Jet A) tabatin su origen for di un refieria Mericano na Lake Charles.
“Nos mezcla di HFO ta suministra for di varios sitio incluyendo Colombia, Panama y St. Croix, pero no for di Venezuela,” e compania a aclaria.
Tambe a agrega cu Fuels Marketing & Supply Aruba N.V. (FMSA N.V.) ta un entidad completamente propiedad di gobierno, “comprometi na principionan di bon gobernacion alinea cu principionan democratico, y sosteniendo derechonan humano – consistente cu Gobierno di Aruba y e paisnan dentro di Reino Hulandes.”
E compania a finalisa bisando cu nan ta spera cu e declaracion aki ta clarifica cualkier malentendido cu por circula den prensa local.
.
