FMO acusa di financia abuso di derecho humano riba plantacion

Banco di desaroyo Hulandes, FMO ta un di cuatro prestamista acusa di financia abuso di derechonan humano den sector di azeta di palma den Republica Democratico di Congo.

Human Rights Watch (HRW) a reporta cu cuatro banco di desaroyo cu sosten di estado a inverti alrededor di 91 miyon euro desde 2013 na Feronia. Ta acusa e compania di basha desperdicio sin trato den awa, exponiendo trahadonan na pesticida peligroso y pagando nan menos cu $1.90 pa dia, cual ta e limie di Banco Mundial pa ‘pobresa extremo’.

Feronia lo tene un reunion cu accionista dia 25 di november proximo na London cu e cuatro banco, cual tambe ta inclui BIO di Belgica, CDC Group basa na Reino Uni, y DEG di Alemania, pa discuti su record social y ambiental.

PHC, subsidiario di Feronia na DR Congo, ta un di e cinco doño di trabou priva di mas grandi den e pais, cu mas di 10mil trahado riba payroll y alrededor di 100mil persona bibando na su plantacionnan, cual ta lease di gobierno.

HRW a bisa cu a entrevista mas di 200 persona, incluyendo mas di 100 trahado den e tres plantacion di PHC. Trahadonan a keha di iritacion di cuero,blaar, problema di wowo of vision y mancha. Dos tercio di hende homber a bisa cu nan a bira impotente desde cu a cuminsa traha. Ley Congoles ta rekeri pa hende cu ta traha den trabounan di halto riesgo ricibi test medico obligatorio, pero e trahadonan den plantacion di PHC a bisa cu nan nunca a ricibi nan resultado.

HRW tambe a papia cu managernan, kende a bisa cu toneladanan di desperdicio sin trata for di e molinonan di azeta di palma di PHC a ser basha den awa cu ta pasa a traves di cas di e empleadonan, creando un mal holo.

Luciana Tellez, investigado di medio ambiente y derechonan humano na HRW, a pidi e banconan di inversion pa tene Feronia responsabel tocante su violacionnan ambiental y di ley laboral. “E banconan aki por hunga un rol importante promoviendo desaroyo, pero nan ta sabotiando nan mision door di faya di sigura cu e compania cu nan ta financia ta respeta e derechonan di su trahadonan y comunidadnan riba e plantacionnan”, el a bisa. “E banconan mester insisti pa Feronia repara e abusonan y compromete na un plan concreto pa caba cu nan.”

Feronia y FMO a bisa Trouw cu a aumenta salarionan e aña aki na 3 euro pa dia, y cu e desperdicio den awa ‘no tin efecto ambiental’. “Lo opuesto ta berdad: e ta traha bon como fertilisante den e plantacion”, segun director di e compania, Xavier de Carniere.

Esaki no ta prome biaha cu FMO ta ricibi critica pa su inversionnan den paisnan den desaroyo. Luna pasa, Trouw a reporta cu sikiera shete proyecto financia pa e banco, cual ta 51% propiedad di estado Hulandes, a experimenta problemanan serio. FMO a financia parcialmente proyectonan na Honduras y Panama, cu a conduci na morto di manifestantenan. E director di e compania construyendo e dam na Honduras a ser aresta y acusa di participa den asesinato.