Casi un aña despues cu museo di industria a wordo habri, Fundacion Museo Arubano (FMA) ta comparti kico ta nan vision y retonan den un entrevista exclusivo cu Bon Dia Aruba. Directora di FMA Anky Vrolijk ta splica cu FMA ta existi pa casi 2 aña. E rason cu a bin cu e fundacion aki tabata pasobra ora e museo historico na Fort Zoutman a wordo habri, tabatin mester di pone esaki bou un fundacion.

Segun sra. Vrolijk: “Ora cu a cuminsa e fundacion aki e idea tabata cu lo laga tur museo cay bou di un fundacion. E idea tabata cu si pone tur museo bou un fundacion lo por bin na remarca mas facilmente pa fondo y donacion internacional. Pasobra Aruba ta forma parti di reino, nos ta bin na remarca pa hopi fondonan den Europa.”

Metanan y retonan
Sra. Vrolijk ta splica cu e fundacion tin como meta pa maneha eventualmente 5 museo na Aruba, cual ta museo historico, museo comunitario, museo di industria, museo arkeologico y museo di carnaval. ‘Nos intencion ta pa informa e pueblo, tanto e hobennan como hende grandi’ sra. Vrolijk a bisa.

Pa purba yega na informa hobennan, e fundacion ta acerca scolnan unda ta duna presentacion y invita nan pa bishita museo, segun sra. Vrolijk. “Nos tin hopi plannan cu nos no a concretisa completamente y pa esaki mi por bisa ta importante pa nos sigui desaroya, ya cu nos ta un fundacion relativamente jong.” Sra. Vrolijk a splica cu e museonan tin bishitante consistiendo di tanto local como turista. “Nos tin un grupo en especial cu ta hopi interesa den e museonan. Tin informacion di ATA cu ta indica cu turista di e generacion millennials ta birando un mercado mas grandi y e grupo aki en particular ta interesa den cultura. Esaki ta un tendencia mundial. Di e manera aki e rol di FMA ta bira un hopi mas grandi.”, sra. Vrolijk a splica.

Pa atrae turista pa bin bishita e museonan, por wak un diferencia entre un museo cu ta cercano na areanan di crucero y hotel, y un museo manera esun di industria na San Nicolas cu ta keda leu, segun sra. Vrolijk. Pa purba atrae turista y tambe local na e museo di industria, ‘nos ta organisa eventonan manera Experience San Nicolas. Esaki nos ta haci conhuntamente cu otro fundacionnan manera Cosecha pa ofrece un experiencia mas varia cu workshops, entre otro.’

Habrimento museo di industria
Durante e prome aña di existencia di e fundacion, a enfoca hopi riba e proyecto pa habri e museo di industria na San Nicolaas. Esaki tabata un reto grandi pa e fundacion, ya cu e otro museonan cu a cay bou di e fundacion tabata existi caba.

Sra. Vrolijk a splica cu ‘bo mester tin e hendenan clave cu ta haci e proyecto posibel, y pa nos e persona aki tabata Renwick Heronimo, e curator di e proyecto.’ Segun sra. Vrolijk, sr. Heronimo a percura pa e contenido di e museo. E tabata encarga di haci tur e investigacion pa sigura cu e informacion ta corecto, specialmente pa tur cos ta fiel na historia. Un otro reto ta ora ta cuminsa e proceso di busca personanan cu ta interesa den traha na museo, segun sra. Vrolijk. “E ta algo cu ta hopi importante pasobra e persona mester tin pasion pa su trabou, ya cu nan ta e cara di e museo. Pa esaki nos ta hopi contento cu nos team na museo di industria cu a siña e trabou hopi lihe y ta haciendo esaki inmensamente bon.”

E fundacion a haya conseho y ayudo di hende di afo tambe, sra. Vrolijk a clarifica. “Den e caso aki tabata un compania cu ta yama Opera Amsterdam. E compania aki ta renombra internacionalmente cu a habri diferente museo rond mundo. Nan a guia nos den e proceso y pa algun detaye manera e luz cu mester uza pa ilumina e artefactonan.” sra. Vrolijk a splica.

Conexion cu otro museo
Tin varios instancia riba Aruba, manera fundacionnan cu meta pa proteha naturalesa cu ta colabora cu otro instancianan regional. Riba e punto aki sra. Vrolijk a bisa cu nan no tin conexionnan cu otro museonan regional. “Nos tin conexion caba cu Hulanda, pero no cu paisnan mas cercano. E ta algo cu nos a palabra pero nos no a logra crea un conexion. Pero e ta nos intencion pa haci esaki y lo ta hopi ideal pa haya conexion cu por ehempel Colombia.” sra. Vrolijk a bisa. E conexion cu Hulanda ta encera cu tin contacto cu Björn Stenvers, kende ta maneha mas cu 49 museo den Amsterdam, segun sra. Vrolijk. “Nos ta spera cu den proximo aña por trece sr. Stenvers bek.”

Proyectonan actual
Actualmente e fundacion ta enfocando su mes pa habri museo comunitario na Nicolaas Store y pa haci cambionan na Bon Bini Festival. Bon Bini Festival ta un evento semanal cu ta tuma luga na Fort Zoutman cada diamars pa promove cultura y historia di Aruba. “Nos ta invertiendo hopi pa haci e experiencia uno mas placentero, por ehempel hopi di e stoelnan ta bieu. Nos kier modernisa diferente aspecto di e evento sin toca e contenido, pasobra nos ta haya esaki ta fiel na nos cultura.” Sra. Vrolijk ta clarifica cu Bon Bini Festival tabata cay bou di ministerio di cultura antes, pero ora e fundacion a cuminsa a laga esaki pa e fundacion.

“Nos kier cambia cierto cosnan pero nos ta sigui cu e mesun hendenan cu tabata haci e proyecto posibel originalmente. E intencion no ta cu nos ta tuma control di e situacion, nos kier colabora. Pero tin biaha e ta dificil pa tuma decisionnan eficientemente di e manera aki.”, sra. Vrolijk a splica.