Den e doorlichting rapport tocante enseñansa cu a keda publica e aña aki, un di e 13 recomendacionnan di parti di e grupo di trabao ta mehoracion di e fluho entre e tiponan di educacion na Aruba.

E sistema di educacion na Aruba ta comparable na e sistema Europeo Hulandes. Educacion primario tin un duracion di ocho aña y ta dividi den educacion preparatorio, dos aña di kleuter, y seis aña di educacion basico. Despues di esey e alumnonan ta cuminsa cu educacion secundario cu ta dividi den diferente nivel y un direccion di educacion general y di orientacion profesional.

E conseho di e scol primario y e doorstroom toets nacional cu e alumnonan ta tuma den nan ultimo aña di educacion primario, zesde klas, ta determina e nivel secundario y e direccion secundario di e alumno. Ademas algun scol secundario tin nan propio proceso y test di admision.

Mas di 70% di e poblacion local tin un diploma di nivel MAVO of inferior na esaki. Esaki ta nifica cu e educacion vocacional inferior EPB, pero tambe MAVO hopi biaha ta e nivel di salida. E fluho entre e nivelnan primario, secundario y avansa no ta optimo.

Esaki kiermen cu no semper e plan di estudio ta fit bon, of cu no ta alcansa e nivel rekeri suficientemente pa e siguiente stap. Esaki ta hiba na un fluho di salida trempan, un duplicacion y abandono provisional ariba di e promedio. E progresion den un sector tambe ta laga hopi di desea.

E grupo di trabao a indica cu na 2015, SER107 a señala diferente obstaculo den e sistema educativo di Aruba. Varios di e obstaculonan aki ta referi na e transicion den e sistema y nan lo sigui ta relevante. Un obstaculo importante den e diferente transicion den e sistema educativo di Aruba ta e diferencia di idioma di instruccion. E grupo di trabao ta considera esaki como un obstaculo crucial y a incorpor’e den un recomendacion separa.

E otro obstaculonan cu a identifica den 2015 y cu ta relaciona cu e transicionnan entre e diferente sectornan ta referi na e sistema educativo cu ta basa ariba e variante Hulandes cu hopi transicion, e polarisacion den e sistema educativo y e rekisitonan adicional di admision cu nan fiha.

Den e sistema escolar di Aruba ta dificil realisa un serie di transicion. Esaki ta referi na e transicion pa un nivel inferior of superior den un sector, pero tambe na e transicion entre otro sectornan.

E grupo di trabao ta splica cu debi na e tamaño di escala di pais Aruba, e opcionnan di estudio despues di educacion secundario ta hopi limita. Aunke EPI ta ofrece curso den cuater sector, esaki no ta comparabel cu por ehempel e cantidad di opcion cu tin na Hulanda. Particularmente, riba nivel universitario, tin tiki oferta riba e isla. Como resultado, e studiantenan ta depende di otro paisnan pa nan continua nan estudio, particularmente Hulanda, y e sistema educativo a adapta como consecuencia di esaki.

Esaki, nan ta remarca, ta refleha den e idioma di instruccion cu ta Hulandes den e añanan di educacion superior, den e administracion di e examen central Hulandes y e metodonan di enseñansa, y den e diseño di HAVO y VWO, y den e hecho cu e diplomanan di HAVO y VWO ta wordo entrega pa gobierno Hulandes, ta considera nan ekivalente na e diplomanan di Hulanda pa loke ta trata admision di educacion superior.

Nivel di conexion y plan di estudio insuficiente

Ademas di e ineficiencianan den e sistema educativo, e grupo di trabao ta señala cu ora cu ta trata di conexionnan den y entre e sectornan, e alumnonan no semper ta suficientemente prepara pa duna e stap na e siguiente nivel.

Por ehempel, EPB ta usa e prome aña pa eleva e nivel di Hulandes di e alumnonan cu ta drenta e scol. EPI cu ta haya un gran cantidad di alumno di MAVO y nan ta señala cu e habilidadnan profesional di e grupo aki ta laga hopi di desea y IPA ta rechasa futuro studiantenan debi na e nivel abao di wiskunde. Segun e scolnan ta existi diferencianan local den e nivel domina pa dilplomanan similar.

Diferente rekisito di admision

Aunke e rekisitonan di admision keda wordo determina pa Minister di Enseñansa, den practica e rekisitonan di admision ta determina pa e directivanan escolar y ta ahusta esakinan anualmente.

Por ehempel, HAVO/VWO ta aplica rekisitonan di admision adicional ademas di e doorstroomtoets y e recomendacion di e scol y no semper nan ta acepta tur profiel di graduadonan di MAVO. Pa drenta MAVO e doorstroomtoets ta suficiente y EPB tin su propio examen di admision pa determina e nivel di e studiantenan.

IPA tin un examen di admision cu hopi tiki studiante ta pasa, den 2021 solamente 14 di e 80 studiante cu a tuma e examen a aproba esaki. Esaki tambe tabata pa motibo di ‘no show’.

Ademas e peso di e resultado doorstroomtoets y asesoramento escolar ta diferencia, e grupo di trabou ta indica. Pa un scol e conseho escolar ta esun mas importante, otro scol ta analisa e puntonan di algun materia y otros scol ta tuma e resultadonan di e examen como punto di salida.

Falta di intercambio y cooperacion

E grupo di trabou ta agrega cu e scolnan hopi biaha no conoce otro bon y no ta intercambia informacion of apenas nan ta hacie Esaki tampoco no ta wordo anima pa a e directivanan escolar, incluso e scolnan bao e mesun directiva tin biaha no tin idea di e desempeño den comparacion cu e otro scolnan den e mesun directiva, y mucho menos den comparacion cu e promedio nacional.

Nan ta remarca cu no tin informacion cu ta intercambia referente e studiantenan cu ta cambiando di nivel of sector. E falta di informacion ta haci cu e problemanan di conexion ta descuida y no tin incentivo pa haya un solucion pa esaki.

Pa mehora e fluho di transicion den e sistema educativo e grupo di trabou ta haci tres sub-recomendacion. E prome ta sigura cu e rekisitonan di admision ta igual pa cada sector. Mester sigura cu esakinan wordo coregi y elimina e posibilidad di rechaso individual di studiantenan entre scolnan publico.

E segundo sub-recomendacion ta e ampliacion di ofertanan di educacion pa nivel tres of incluso nivel dos, di educacion y por ultimo, e cooperacion y intercambio di informacion. E grupo di trabou ta propone un transferencia calido den cual e contacto entre e scolnan, sobre todo e alumnonan ta integra den un structura di consulta, obligatorio desde e alumno te por lo menos educacion secundario.