ORANJESTAD – Con flexibel Aruba ta den tuma persona cu tattoo den trabou? Bon Dia Aruba a papia cu artista di tattoo, Antoine Geerman, kende a studia pa esey.

Geerman ta splica cu den su experiencia prome ora tabata traha na Aruba, el a traha den area salubridad, cu su tattoo no tabata mucho visibel. Ta conoci cu tin hende cu tin tattoo visibel cu ta haya comentario negativo, pero tambe positivo. Agregando cu semper tin esunnan cu lo critica manera esunnan cu ta admira

Ora el a bay studia na Hulanda, el a cuminsa pone mas tattoo y caminda unda cu ta mas visibel. Su experiencia na Hulanda ora el a bay aplica pa un trabou, el a haya un comentario cu e tattoo tabata ‘mucho visibel’, como e lo a traha den horeca, e tin chens cu na varios luga lo haci comentario negativo tocante su tattoo, pero el a wordo tuma asina mes y no tabatin ningun keho durante e periodo.

Pa locual ta trata e flexibilidad di persona cu tin tattoo of ta artista, e ta bisa cu e ta birando mas flexibel na Aruba, y ta ripara esey na Bonaire tambe, unda e ta biba actualmente. E ta bisa cu ambos na nivel ‘poco poco’.

Sinembargo Geerman ta splica cu un hefe di trabou, su trahado ta su carchi di negoshi, y tambe manera hefe ta consciente cu no tur hende gusta tattoo. “Pero nan a cuminsa ripara cu nan negoshi tin cu keda draai, y hopi mas hende a cuminsa pone tattoo. Nan no por bay keda bisa no na persona cu tin tattoo, pa motibo cu nan kier un cu no tin. Na Hulanda ta hopi mas flexibel pasobra nan a ripara esey for di prome caba. Na Aruba, hopi biaha nos ta keda pega riba un pensamento. Bo no por stop arte.”

Geerman a agrega cu hende lo husga cu of sin tattoo. E ta continua bisa cu na pais chikito mas ainda, pa motibo cu no tin mucho di haci. “Hende a cuminsa ripara cu e t’ey. Nan lo mester biba cu e realidad cu nan ta bay topa un of dos persona riba caminda tur pinta. Di wak esaki mas biaha, ta yega un momento cu ta siña biba cune. E no a cambia ful ainda, pero e ta cambiando si, pero ya nunca henter, pa motibo cu cada hende tin nan mesun opinion.”

Bon Dia Aruba a papia cu vocero di Departamento di Labor, Richenel Stamper, pa puntra si na Aruba tin dificultad pa persona cu tattoo haya trabou, of tambe por mira e flexibilidad di e dunando di trabou.

Stamper a bisa cu e no ta ni si, ni no, pero ta algo cu mester wordo splica ora persona ta bay busca e trabou. “Nos experiencia ta cu e ta varia cu cada dunado di trabou. Pero tin e tendencia cu e ta birando poco mas aceptabel si.”

E ta agrega cu no ta tur caminda y no pa tur funcion. Un ehempel cu Stamper a duna cu tin compania por ta flexibel, pero depende di e funcion. “Si e persona ta atende publico, of un front desk. Si e ta un representante di un organisacion. Tur cos ta depende mayoria di biaha pa e funcion di e persona. Pero por bisa den comparacion cu antes, e ta mas flexibel.”

El a agrega cu tin compania cu ta bisa ‘bo no por kita e tattoo, pero ta bisti uniform’ of ta wordo bisa pa bisti camisa manga largo, of nan ta duna un sleeve pa asina tap’e durante ora di trabou. Stamper ta bisa cu e no sa si a yega di nenga un persona trabou pa motibo di tattoo, pero e ta asumi cu e ta algo cu por pasa.