Bida diario di e pueblonan indigena remoto, Tembe, den selva Amazonico di Brazil, ta mescla tradicion cu modernidad. Nan ta caza cu flecha, pisca pa piraña, y colecta plantanan salvahe, mientras otronan ta mira novela riba television of check internet riba celular den nan hut.
Nan ta pinta nan cara cu tiña di simia pa prepara pa bataya, y tambe ta uza tecnologia di video pa combati madereronan ilegal y otro menasa. Nan ta baña den riunan bruin mainta, y hunga futbol den campo di santo bistiendo jersey di teamnan Europeo, manera Chelsea, atardi.
Den un estado Brazileño devasta pa deforestacion y miles di candela, e Tembe ta saca potret y video pa documenta e tala di palonan den nan teritorio pa madereronan, y ta comparti esaki riba rednan social. Tambe recientemente nan a reuni cu un NGO cu a ofrece e tribu drone y sevicio di GPS pa track e tala ilegal, a cambio di tala sostenibel. Y manera nan ancestronan, nan ta planta mata pa siña nan yiunan e balor di preserva e selva di mas grandi di mundo.
“Mi ta bisa mi yiunan: Mi a planta pa bo, awo abo tin cu planta pa bo yiunan”, Cidalia Tembe a bisa na pueblo Tekohaw, unda e ta crece fruta, berdura y yerba medicinal. “eseynan ta remedi di cas”, el a bisa. “Nos no ta bay botica den ciudad, nos ta traha nos mesun remedi. Nos tin mas confiansa den locual ta di nos.”
Orguyosamente el a punta na matanan di sucu – cada un cuida pa un di su yiunan – y awakati, coco, lamunchi, y acai, e berry Amazonico cu ta forma parti di un desayuno yena cu vitamina na Brazil. “Esaki ta paraiso”, su esposo, Muti Tembe a bisa.
Un di e matanan a wordo planta pa welo di Muti, un chief Tembe y fundado di Tekohaw. Pa varios generacion, miembronan di e tribu a extrae tiña preto di e mata di Jenipapo ey pa pinta nan curpa durante celebracionnan.
Como 2mil Tembe ta biba den nan teritorio di 2,766km2 di Alto Rio Guama, cual ta accesibel unicamente despues di biahenan largo riba boto of caminda di tera. Pueblonan rond di e riunan Guama y Gurupi cu ta dividi e reserva por varia den tamaño for algun decena di persona te cu miles. E reserva indigena ta oficialmente protegi, pero constantemente bou menasa di madereronan kende ta purba extra palonan ilegalmente.
Amazonia, di cual 60% ta na Brazil, tambe ta cas di 20% di especie di mata di Tera, hopi di cual no por haya niun otro caminda. Data di satelite for di Agencia Espacial di Brazil a mustra un aumento den deforestacion y candela den ultimo aña.
“Nos mester lucha pa e matanan cu ta permiti nos hala rosea”, segun Gleison Tembe di Ka’ a kyr, nomber cu ta nifica ‘selva berde’.
Emidio Tembe, chief di Ka’ a kyr, a bisa: “E parti aki tabata selva nativo. Pero candela a yega y laga e tera bashi.”
