Dia 7 di april ultimo Fitch Ratings, un di e rating agencies cu ta evalua Aruba anualmente, a publica su evaluacion pa 2021. Ta cambia e ‘Outlook’ (perspectiva) cu desde aña pasa tabata negativo, pa positivo. Ta mantene sin embargo e cualificacion di ‘BB’ cu a keda na un paso di ‘junk status’ cual ta ‘B’.Na 2019 Aruba ainda tabatin un rating di ‘BBB’- cu na 2020, a causa di e pandemia, a baha cerca Fitch te na ‘BB’ cu outlook negativo. Contrario na Fitch, e otro rating agency Standard & Poor’s, a mantene su rating di Aruba na ‘BBB’, cu na maart ultimo un outlook ‘stable’. E cambio positivo (y relativo) di Fitch ta directamente relaciona cu e ayudo y compromisonan cu Hulanda.

 E cambio di e Outlook pa positivo ta refleha expectativa di Fitch cu e “ayudo externo extraordinario financiero, di salud y institucional”, cu Aruba a ricibi di Reino Hulandes como respuesta na e pandemia d Covid-19 lo continua durante 2021-2022. Segun e reporte, “Na november 2020 gobierno di Aruba a bay di acuerdo cu cierto compromiso di politica fiscaly economico, a cambio di asistencia cu prestamo y di atende debe externo cu interes abao di Hulanda. Esaki lo pone debe consolida di gobierno/GDP riba un tendencia di descenso, despues di ‘peak’ na 108% (2021).”
“Fitch ta kere cu e peso di Aruba su debe y e deficit actual lo presenta desafio pa sostenibilidad si mester refinancia na tasa di mercado, den ausencia di e apoyo Hulandes.” Esaki lo ta condiciona na aceptacion di implementacion di reforma fiscal y ecnomico, cu ta depende di aprobacion di e dos leynan (Laft) y pa establece COHO den parlamento.

Segun calculo di Fitch, e pandemia a ocasiona deficit gubernamental/GDP pa bay te na 19.0%, di 0.6% durante 2018-2019, motibo pa gobierno Hulandes pone e metanan fiscal un banda.Fitch ta anticipa cu e deficit/GDP lo baha te na 14% na 2021, a base di un turismo cu ta recupera. Despues na 2022 Fitch ta spera “un reduccion fuerte di e corelacion deficit/GDP te 3.9%, “apoya pa recuperacion economico ciclico, menos transfer y medida fiscal (value-added tax nobo, reforma den empleo y pago den sector publico) acorda cu e Hulandesnan” .

Fitch ta anticipa cu e reformanan presupuestario sostenible combina cu e gastonan di refinanciamento di cero porciento cu Hulanda lo baha gobierno di Aruba su corelacion debe/GDP te 77% na 2025.

Fitch ta dedica atencion tambe na e ambiente politico actual: “E urgencia di Aruba su necesidad di stabilidad financiero y social a surpasa preocupacion pa cu soberania politico y a facilita acuerdo riba e paquete di financiamento Hulandes despues di cinco luna di negociacion. Sin embargo, riesgonan politico ta real. Nos ta anticipa cu parlamento di Aruba, cu a resisti institucionalisacion di e mandato di CAft den ley di Aruba, pa ratifica e acuerdo y aproba legislacion di framework te despues di eleccion parlamentario (na juni/juli 2021). Eleccion na maart a mustra riba continuidad di politica, aunke un gobierno di coalicion nobo por requeri varios luna pa pasa e legislacion general paralelo. (…) Por tin intranquilidad politico nobo, manera entorno e agenda di reforma, legislacion Arubano requeri, o un informe adverso di CAft cu ta retrasa e transferencia condiciona di cada trimester durante 2021-2022.

Economia segun Fitch lo marca crecemento di doble digito na 2021-2022 mientras ta recupera di un contraccion di 26% na 2020. E ruta di crecemento ta refleha dinamica di turismo beneficiando di concentracion di mercado den Noreste Mericano. Fitch ta anticipa ocupacion di hotel di 46% na 2021 (di 27% na 2020). E stabilidad di e sistema financiero a keda manteni, capital regulatorio di banconan ta halto (33.5%, 2020) cu liquidez firme, cu ROE (Return on Equity) bon y cu 5% di NPL (Non Performing Loans) completamente cubri.

Factornan cu por, individual o colectivamente, conduci na accion di rating positivo:

Finanzas publico: Consolidacion fiscal sosteni cu significativamente ta reduci corelacion debe/GDP di gobierno, reflehando aparentemente e implementacion di reforma presupuestario structural y econtinuacion di apoyo financiero real di Hulanda. Den sentido macro: mas invesrion priva cu ta conduci na crecemento economico cu ta mas halto di otronan den nan categoria.

Factornan cu por influencia negativamente, conduciendo na accion di rating negativo/ downgrading: Finanzas publico: Faya den mantene acceso na financiamento di Hulanda cu ta causa problema financiero y ta trece riesgo di credibilidad pa e tasa di cambio fiho (cu dollar; red.). Tambe fayo pa reduci corelacion debe gubernamental/GDP, por ehemplo pa falta di suficiente medida di maneho fiscal o crecemento economico debil prolonga.