Diaranzon dia 23 di maart e agencia di evaluacion financiero Fitch Ratings den su informe annual a mantene Aruba su rating na ‘BB’ y cu e mesun outlook di aña pasa na ‘stable’. Esaki riba e criterio conoci como Long-Term (LT) Foreign-Currency (FC) Issuer Default Rating (IDR).

Den vista di Fitch, Aruba su rating ta refleha gobernacion y entrada per capita fuerte y dependencia limita di exportacion di materia prima, compara cu otro den su categoria. “Aruba ta beneficia di apoyo institucional y financiero Hulandes fuerte como miembro di Reino Hulandes cu ‘status aparte’, demostra pa e prestamonan di liquidez di emergencia y e donacion di vacuna contra Covid-19 durante 2020-2021. E ratingnan ta bao presion di Aruba su debe publico halto y peso di interes, y vulnerabilidad pa shock externo di e economia di un solo pilar,” segun Fitch.

Debe publico total halto a keda na 101% compara cu GDP na 2021, sin cambio y na mesun nivel cu 2020. Fitch ta anticipa cu debe publico lo baha na 2022 na 93.6%, a base di recuperacion economico y un deficit gubernamental mas chikito. “Sin embargo, nos ta anticipa cu debe/GDP lo keda halto pa futuro cercano y bastante mas halto cu e mediana pa ‘BB’, di 56.6% ba 2022,” Fitch ta formula. (Median (Ingles)o mediana (Spaño) ta e limite separando e 50% cu score mas halto di e 50% mas abao riba un lista o tabel; no ta mescos cu average; red.). Ta anticipa tambe cu e corelacion di interes/ingreso di gobierno ta baha te na 17.1% na 2022 mientras entrada di gobierno ta mehora, aunke ainda e ta bastante mas halto cu e mediana actual pa ‘BB’ cu ta 9.5%. Fitch ta señala tambe cu fondo di pension APFA ta tene un total di debe di gobierno na nivel di 12.8% di GDP na 2021.

Encuanto deficit gubernamental Fitch ta indica cu deficit presupuestario a baha na 2021 te na 10.1%, despues di e deterioro te 18.1% na 2020 den e crisis di pandemia. Na 2022 esey lo baha te na 4.2% na 2022. Pa 2023 e deficit por baha te na 0.5%, “a pesar di presion persistente di gasto publico di personal”. Esaki a base di introduccion di un VAT (BTW) na 2023 cu lo aumenta entrada di gobierno considerablemente. E surplus primario aki di 3%, o mas, di GDP entrante 2023 ta suficiente segun Fitch pa reduci debe publico. Sin embargo Fitch ta indica cu “voluntad di Hulandesnan pa extende apoyo financiero despues di i2022 ta insigur, specialmente si gobierno ta faya den yega na un surplus sostenible general den presupuesto. Ta anticipa cu Aruba ta bay financia nan deficit di 2022 riba mercado local, mientras e apoyo financiero Hulandes ta keda clave pa sostenibilidad di debe publico y pa credibilidad di e acoplamento di nos moneda na moneda convertible. Aruba lo reasumi pago riba su debe externo riba propio forza, o pa refinancia, na 2023. Di esaki US$ 254 miyon ta comercial y US$ 505 ta di debe Hulandes cu ta madura.

Fitch ta pone hopi enfasis riba e importancia di e relacion cu Hulanda. Ta referi na e ayudo duna caba y loke ta haciendo actualmente. Gobierno di Aruba a haya posibilidad pa prestamo pa financia debe cu ta madura e aña aki (US$ 193 miyon) y a extende e prestamonan cu a madura e aña aki (total US$ 505 miyon), cu 18 luna te den segundo parti di 2023. Tambe despues lo mester dicidi riba rumbo cu e prestamonan lo tuma, sea un prestamo a largo plazo o un donacion, cu segun Fitch lo depende di e forma con Aruba lo cumpli cu e metanan di presupuesto y reforma. Tambe ta referi na e dos leynan cu lo introduci na nivel di ley di Reino, pa supervision financiero y pa acompaña e reformanan acorda den cual Hulanda lo bay inverti. Segun Fitch, “E Hulandesnan a busca avance material den esakinan (e leynan; red.), como tambe den asunto di eficiencia den sistema di impuesto, payroll y di salud, promer cu cautelosamente drenta den negociacion financiero a mas largo plazo”.

Economia ta recupera
 Fitch a comenta tambe riba desaroyo economico faborable, cu segun e agencia a crece cu 15.5% di GDP na 2021 y ta anticipa cu na 2022 lo mira un crecemento di GDP di 7.7%, despues di e contraccion economico di 22.3% na 2020. Turismo stay-over a recupera fuertemente na 2021 pa yega na 96% di e volumen average di 2019 na december 2021. Sin embargo, ta indica cu condicion di mercado laboral y di credito ta keda debil, reflehando menos actividad den restaurant, retail y evento, ademas di salarionan reduci. Banconan ta mantene un ratio fuerte di capital (37% na december 2021) cu un reduccion tumando lugar den prestamo no cumpli (‘non-performing loans’), cu average di 4.7% na 2021. Fitch ta contempla tambe e desaroyo di inflacion e aña aki, primordialmente a causa di aumento di prijs di transporte y electricidad, cu base den aumento drastico den prijs di crudo y producto petrolero, cu ta calcula na 5%, di 0.8% na 2021. Inflacion calcula ‘di aña pa aña’ a yega na 3.3% na januari ultimo, segun Fitch.