Antayera Fitch como prome ‘rating agency’ a duna su evaluacion pa e aña aki. Ta mantene e rating di BBB- cu ‘stable outlook’ cu Aruba tin desde 2014. E tempo ey Aruba a perde su status di A- cu e tabatin pa varios aña. Clave den e evaluacion di e aña aki, mescos cu e añanan anterior, ta e importancia cu Fitch ta duna e papel di Reino como garantia extra cu Aruba ta sigui den e bon rumbo.
Fitch ta calcula e deficit financiero di gobierno central na 3,7% na 2015, mencionando cu esaki ta riba e ‘cash basis’ cu Banco Central ta aplica, mientras cu gobierno riba ‘transactiebasis’ ta yega na 2%. CAFT a calcula e deficit na 2,9% den su rapport mas recien. Di tur manera, esaki ta hopi miho cu e 9,4% na 2014, cu sin embargo tabata inclui e pago grandi di Afl. 170 miyon na APFA. Aña pasa Fitch a calcula cu e inyeccion financiero aki a añadi 3,6 punto di porciento na e deficit, cu sin esaki lo tabata 5,8%. Por conclui anto cu e deficit real a baha di 5,8% te 3,7%. Di otro banda ta constata cu debe publico a sigui aumenta aunke menos rapido y ta awor na 82% di GDP.
Tambe Fitch ta remarca cu e ahustacionnan te awor a bin mas tanto di aumento di entrada y no di baha gasto. Tambe ta menciona cu gobierno ta considera introduci e ABB y e impuesto riba transaccion bancario. Si esey ta corecto anto e ta significa cu gobierno lo sigui aumenta entrada a costo di e consumo individual, manera ta tumando luga pa varios aña caba. Esaki ta haci cu Aruba su crecemento economico real (0,1% na 2015) ta bastante mas abao cu e otro paisnan den e categoria aki, ya cu e caida den consumo local ta deshaci di gran parti di e crecemento den turismo. Punto positivo ta cu e posicion pa loke ta reserva di moneda stranhero a mehora, pa medio di menos importacion y aumento di entrada di turismo.
Fitch ta anticipa cu Aruba, cu e apoyo di Reino (CAFT) ta continua riba e caminda pa yega na baha e deficit na 2017 y yega na un surplus na 2018. Riba su mes e resultado di e sondeo anual aki di Fitch no mester sorprende ningun hende. Esaki ta e imagen cu a surgi caba for di e rapport pa fin di 2015 di CAFT y di Banco Central. Nos ta den un situacion cu por resulta bon, den sentido economico, pero no por spera un crecemento considerabel den e fase aki, fundamentalmente pasobra manera señala pa Fitch tambe, e consumo local lo sigui abao. Y si gobierno dicidi di sigui cu su plannan pa saca mas placa for di economia pa mehora su propio situacion financiero, nos lo por mira un caida mas fuerte di e consumo local.
Pero kico esaki ta significa pa e ciudadano comun y coriente? Esnan cu tin un entrada bon lo no ta tanto preocupa, pero pa gran parti di nos poblacion esaki no ta asina. Sigur si e refineria no habri mas, gobierno lo mester considera otro medida pa cumpli cu su presupuesto. Segun CAFT, esey por ta introduccion di e ABB of un aumento di e porcentahe di BAZV. Den ambos caso, e consumidor ta keda cu menos placa pa gasta libremente. E parti grandi di poblacion cu ta biba riba un minimo lo no tin miho perspectiva manera cos ta mustra awor.
Di otro banda, e medidanan di austeridad cu gobierno a aplica ta cay net riba e gruponan vulnerable den nos comunidad. Ta trata di hende di edad halto, hobennan cu ta saliendo di prizon cu mester atencion special, y tur e otro formanan di asistencia social cu a mira nan posibilidadnan financiero reduci bastante. Aparentemente gobierno ta scoge e caminda facil, no buscando problema cu e empleado publico, cu a haya indexering garantisa te 2024, pero cortando otro caminda unda ta spera menos resistencia. Austeridad ta resulta tambe riba otro tereno manera drechamento di caminda, unda e aña aki tin apenas un par di miyon disponibel pa esey. E Green Corridor ta djis un parti chikito di e centenares di kilometro di caminda cu mester mantenemento pa cual awor no tin fondo suficiente.
Un aspecto nos no a mira den e evaluacion di Fitch. Esey ta e pagonan cu gobierno mester cuminsa haci ora e proyectonan PPP (Public Private Partnership) keda cla. Hunto cu e interes riba debe publico esaki por bay yega na un nivel di sigur Afl. 300 miyon pa aña, riba un presupuesto di alrededor di Afl. 1350 miyon (22%). Por presenta e problema cu aumento di e gastonan aki ta bay come e espacio financiero cu gobierno por tin dor di crecemento economico, cu manera ilustra caba lo ta bay ta modera. Ta di comprende den e situacion aki cu gobierno ta e partido cu mas urgencia pa habri e refineria. Nos lo bay tende den e proximo simannan con esey ta bay resulta.
