(AP) – Autoridadnan Colombiano a confirma cu diabierna a aresta e tata di 2 di e 4 muchanan Indigena cu a sobrevivi e caida di un avion unda nan mama y dos otro adulto a fayece y despues a sobrevivi 40 dia nan so den Amazon.
Ministerio Publico di Colombia a confirma den un mensahe na reporteronan di Associated Press cu oficialnan a aresta Manuel Ranoque, ken ta e tata di e mucha hombernan di 1 aña y 4 aña y stiefvader di e dos mucha muhenan di 9 y 13 aña. E declaracion no a duna detaye tocante e causa, sinembargo reportahenan den media a reporta cu e caso aki ta trata acusacionnan di abuso.
Astrid Eliana Caceres, director di e instituto Colombiano pa bienestar familiar, a bisa cu e agencia di e estado tin tempo trahando cu e autoridadnan. “Nos a tende di e detencion di e tata di dos muchanan menor di Mucutuy y nos ta kere cu e fiscal a opera bao cuadro completo di ley,” el a expresa.
Ranoque tin tempo den un lucha pa e custodia di e muchanan cu su welonan materno. Nan mama a fayece 4 dia despues di e caida di e avion segun e yiu mas grandi Lesly.
E 4 muchanan tin desde cu nan a sali for di e hospital despues di ricibi tratamento pa recupera di mal nutricion y otro condicionnan den custodia di e agencia pa proteccion di muchanan di Colombia. Nan welo materno, Narciso Mucutuy, a acusa Ranoque di a dal nan mama Magdalena Mucutuy.
Prome cu autoridadnan por a confirma su aresto, Ranoque a admiti na reporteronan cu nan tabatin problemanan na cas, pero a bisa cu el a considera esaki un topico priva di e famia y no “redo” pa resto di mundo.
Ora cu a puntra Ranoque si el a asalta su casa, el a contesta cu “verbalmente y diripente si, pero fisicamente hopi poco pa motibo cu semper nos tabata pleita mas cu palabra.”
