(AP) — Tres persona a keda acusa en conexion cu morto di Liam Payne, un ex-miembro di grupo musical One Direction, kende a fayece despues di cay for di balcon di su camber di hotel na Buenos Aires luna pasa, segun fiscalnan Argentino a bisa diahuebs.

Fiscal Andres Madrea a acusa e tres sospechoso, di ken no a revela nan identidad, cu crimen di “abandono di un persona sigui pa morto” y di “suministra y facilita uso di narcotico,” segun oficina di e fiscal a bisa. Madrea tambe a solicita nan aresto for di hues Laura Bruniard, kende a duna veredicto cu e tres persona no por bandona e pais.

Payne a cay for di balcon di su camber riba e di tres piso di su hotel den e bario luhoso di Palermo, den capital Argentino. Su autopsia a bisa cu el a muri di varios herida y sangramento externo.

Fiscalnan tambe a bisa cu e examen toxocologico di Payne a mustra cu su curpa tabatin “rastronan di alchol, cocaina y un anti-depresivo prescribi” den e momentonan prome cu su morto.

Investigadornan a bisa oranan despues di morto di Payne cu e tabata su so ora el a cay. Pero oficina di fiscal a bisa diahuebs cu un di e acusadonan tabata frecuentemente cu e cantante durante su tempo na Buenos Aires. E di dos ta un empleado di e hotel kende lo a duna cocaina na Payne durante su estadia entre 13 y 16 di october. Y e di tres ta un dealer di droga.

E cargonan den caso di Payne tin algun similaridad na e casonan Mericano resultando di e morto di strea di “Friends”, Matthew Perry un aña pasa. Assistent personal y un amigo di e actor ta entre e acusadonan di a suministr’e cu ketamina den e ultimo lunanan di su bida, conduciendo na su sobredosis riba e anestetico.

Tres homber jong a keda acusa similarmente den e morto pa sobredosis cu opioide di rapper Mac Miller na 2018.

Autoridadnan local a compila, entre otro pidanan di evidencia, recordnan di celular di Payne, material pa forensico y testimonio. Ainda nan mester unlock computer personal di cantante – cu ta daña – y otro aparatonan cu a confisca.

Autopsia di Payne a mustra cu su lesionnan no tabata causa ni pa su mes ni pa intervencion fisico di otronan. E documento tambe a bisa cu e no tabatin e refleho pa protege su mes den e caida, loke ta sugeri cu e por tabata inconsciente.

Fiscalnan na Argentina tambe a descarta e chens cu Payne a comete suicidio.

One Direction tabata entre e boy bands mas exitoso den temponan recien. A anuncia un hiatus indefini na 2016, y Payne – mescos cu su compañeronan di banda Zayn Malik, Harry Styles, Niall Horan y Louis Tomlinson – a busca un carera como solista.

E cantante a post riba su cuenta di Snapchat cu el a biaha pa Argentina pa atende e concierto di Horan na Buenos Aires dia 2 di october. El a comparti video di su mes bailando cu su pareha, influencer Mericano, Kate Cassidy, y cantando den e tribuna. Cassidy a bandona Argentina despues di e show, pero Payne a keda atras.