(Infobae) – Fiscalia Peruano a denuncia ex-presidente di Peru, Jose Pedro Castillo Terrones y su prome minister, Guido Bellido Ugarte. E acusacion ta basa riba presunto delito di nombramento ilegal, loke ta deteriora Estado Peruano.

Investigacionnan preliminar cu a cuminsa na maart 2024 ta señala e nombramento di Manuel Carrasco Millones como minister di Interior mediante e Resolucion Supremo number 064-PCM, cu fecha di 29 di juli 2021. Segun Fiscalia, Carrasco Millones a asumi su funcion aunke no a cumpli cu rekisitonan legal y constitucional, ya cu e tabata mantene e posicion di fiscal provincial titular specialisa den crimen organisa na Lambayeque.

E situacion ta complica ora ta considera cu Carrasco a solicita un licencia faltando dos dia pa su nombramento y a presenta su renuncia na Ministerio Publico e dia despues, 28 di juli 2021. Sinembargo, e aceptacion formal di su renuncia a tuma luga varios siman despues di su nombramento como minister.

E origen di e denuncia institucional ta bin for di 2021, ora e ciudadanonan José Luis Chombo Jimenez y Ruben Eduardo Fernandez Morales, presidente di asociacion Pro Actione, a presenta e acusacion. E denuncia ta destaca cu Carrasco Millones no tabata conta cu e aceptacion formal di su renuncia como fiscal y, p’esey no tabata reuni e rekisitonan legal pa e funcion ministerial.

Ademas, Pedro Castillo, ex-presidente di Republica, tambe ta bay enfrenta un denuncia constitucional pa presunto comision di delito di fraude. E denuncia a ser presenta pa Fiscalia di Nacion. E ex-mandatario ta acusa di a utilisa di manera no debido avionnan di Forsa Arma Peruano (FAP) y otro aeronave pa asuntonan personal.

Dia 9 di october 2021, Castillo a usa un avion di Forsa Aereo di Peru (FAP) pa biaha for di grupo aereo number 8 di El Callao pa provincia di Jaen, na departamento di Cajamarca. Despues, a desplasa cu helicopternan di Ehercito di Peru te provincia di Chota, districto di Tacabamba. E biahenan aki, segun Fiscalia, no tabata relaciona cu su funcion oficial, sino cu tabatin un fin strictamente familiar, por ehemplo, hacimento di aña di su ruman muhe na cual el a asisti hunto cu dies familiar mas.

Segun rapport di auditoria di Contraloria General di Republica, haci for di januari di e aña aki, a revela cu Castillo a haci uso di avion presidencial cu fin personal cu no ta coincidi cu su agenda oficial. A detaya cu a realisa 98 biahe durante su mandato, entre 28 di juli 2021 y 9 di juli 2022.

Segun rapport di Contraloria, a verifica varios desplasamento den fechanan specifico: 9 y 10 di october 2021, 27 di december di e mesun aña , y durante otro lunanan di 2022. Di e 29 vuelo solicita pa Castillo, por lo menos den 21 di nan su famia a participa, incluyendo su casa Lilia Paredes, su sobrinonan y rumannan, entre otro.