Un multitud di fanatico a purba drenta na Stadion Nacional di Honduras, pa asina mira e wega final entre Motagua y Honduras Progreso, suceso cu a origina un avalancha humano, cu a laga un saldo di cuatro hende morto. Diadomingo pasa a tuma lugar e wega final na Stadion Nacional di Honduras, caminda tabata hunga Motagua y Progreso, pa asina dicidi e titulo di e torneo di clausura.
Miles di aficionado a purba di drenta cu forsa den e stadion, y e suceso a ocasiona cu tur hende a cuminsa huy lihe di e sitio, y nan tabata pasa un riba otro. E saldo tabata 4 morto y 25 hende herida, pa asfixia o cu masha fractura. Prome cu e partido, polis a core cu tur hende cu tabata pafo di e stadion di Tegucigalpa cu gas lagrimogeno, suceso cu a provoca e huida di hopi aficionado” , Miguel Osorio, vocero di Hospital Escuela Universitaria a splica.
Entre e victimanan tin un baby cu tabata den bariga di su mama cu a muri. El a keda cu hopi golpi riba su curpa. E victima mortal a inhala gas, nan a cay na suelo y a keda trapa pa e otro hendenan cu tabata purba di huy for di e lugar di e suceso”, un vocero a splica. Polis a denuncia cu organisadonan a bende mas carchi cu e cantidad autorisa, y esey por ta e causa di e tragedia. “E stadion tabata totalmente yen, mientras cu pafo tabatin hopi persona wardando pa drenta cu un carchi den nan man. E hendenan a rabia ora cu nan no a logra drenta,” polis a informa den un comunicado.
Motagua a gana 3-0 pero riba Twitter e presidente di e club, Eduardo Atala, a bisa cu nan “ no tin nada pa celebra, pasobra a tuma lugar un tragedia den e stadion”.
