(EFE) – Fiscalia ta investiga penalmente Nicolas Petro, yiu mayor di presidente Colombiano, Gustavo Petro, pa supuesto reunionnan cu narcotraficantenan den prison y pa un posibel “labamento di activo”, segun e organo aki a informa ayera diamars.

“Unidadnan di Fiscalia General di Nacion ta investigando den e caso penal y den e caso di bienes of posibel labamento di activo, esey ta avancenan cu tin,” e fiscal general Francisco Barbosa a declara.

Fiscalia a cuminsa cu esaki na principio di luna, investiga tur acusacion contra e diputado Nicolas Petro, ken su ex-casa ta señala di haya placa di un narcotraficante pa e campaña presidencial di su tata, sinembargo e placa nunca a yega na su destino.

E mesun mandatario a pidi pa investiga su yiu y su mesun ruman Juan Fernando Petro pa “determina responsabilidadnan”, aunke semper nan a mustra “confiansa” cu nan “por demostra nan inocencia.”

“Ta existi un presunsion di inocencia y ta existi garantianan hudicial. Loke ta pasa ta cu tur investigacion di Fiscalia semper ta enfoca riba e personanan den campo penal y pa e bienes, si den caso no tin bienes relaciona cu actividadnan criminal” e fiscal a bisa ayera diamars na medionan di comunicacion.

Ex-casa di Nicolas Petro, Day Vasquez den un entrevista a sigura cu e narcotraficante Samuel Santander Lopesierra, alias “el hombre Marlboro”, a entrega na Nicolas Petro, diputado di Asamblea departamental di Atlantico, “mas di 600 miyon peso (casi 124.700 dollar awendia) pa e campaña di su tata.”

“Esey nunca a yega legalmente na e campaña pasobra el a keda cu e placa, y asina otronan mas,” e muhe a agrega y a menciona cu Nicolas Petro tambe a ricibi 200 miyon peso (41.500 dollar) di empresario Alfonso ‘Turco’ Hilsaca, den cual e placa tampoco a bay na e campaña.

Segun informacion publica den e website La Silla Vacia, Vasquez a comunica tur e datonan aki na otro yiu di Petro, Andrea, ken a bis’e na su tata prome cu aña pasa lo a caba, pero te awor, ora informacion a bira publico, e presidente no a actua.

Pa loke ta trata e investigacion contra Juan Fernando Petro, ruman di e presidente, Fiscalia tin habri un “noticia criminal di oficio” (un investigacion pa wak si tin indicio di delito) for di 23 di januari ultimo, pa motibo cu su nomber a aparece relaciona cu presunto pagonan realisa pa narcotraficantenan pa haya espacio den acuerdo di paz total, aunke e ta declara su mes cu ta victima di usurpacion di identidad.