Fiscalia General di Colombia ayera diabierna a confirma e captura di e dos polis involucra den e morto di Javier Ordoñez, como tambe e detencion di cinco persona cu tin vinculo cu disidencia di FARC, pa “promove actonan di vandalismo” den protestanan di siman pasa na Bogota.
“Awe mi ta anuncia pa e pais e captura di e dos patruyero, Harby Rodriguez Diaz y Juan Camilo Lloreda Cubillos, investiga pa e morto di e señor Javier Ordoñez cu a sucede dia 9 di september”, fiscal general Francisco Barbosa a anuncia.
Fiscalia lo presenta e detenidonan na un hues di control di garantia y lo acusa di delitonan di tortura y homicidio agravado.
Rodriguez a wordo captura diahuebs ultimo na bario Rosa, sur di Bogota, mientras cu Lloreda a entrega su mes pa autoridadnan ayera diabierna despues di varios diligencia di verificacion y inspeccion den casnan di parti di Fiscalia.
E dos agente ta señala como presunto responsabel di e morto di Ordoñez, di 46 aña, ken a fayece na un clinica di Bogota dia 9 di september ultimo despues cu brutalmente el a wordo ataca pa agentenan uniforma, cu varios biaha a descarga riba dje un arma electrico teaser durante su aresto.
E captura a keda conoci oranan despues cu a publica e relato di Wilder Salazar, amigo di e victima y testigo di abuso policial, ken a conta cu Ordoñez a haya golpinan fuerte y a pidi ayudo cu a wordo nenga pa polis.
E morto di Ordoñez a causa violento protestanan contra abuso policial, cu a kita e bida di otro 13 persona, dies di nan di Bogota y otro tres na localidad di Soacha.
Alcalde di Bogota, Claudia Lopez, a responsabilisa e polisnan di e morto di e 13 persona aki na base di videonan den cual por mira algun di nan cu ta tira cu arma di candela.
