Fiscalia Peruano diamars pasa a drenta den e vivienda di Nadine Heredia, casa di e ex-presidente Peruano Ollanta Humala, 26 propiedad y oficina, relaciona cu e investigacion pa supuesto acto di corupcion cometi cu e concesion pa Odebrecht di e obranan di e Gasoducto di Sur.
E inspeccion a cuminsa den e prome oranan di mainta y tabata bou encargo di Fiscal Geovanna Mori, e ekipo encarga di investiga e rijnan di e caso Lava Jato na Peru, ken a solicita y a obtene autorisacion di e Husgado dos di Investigacion specialisa na delito di Corupcion di Funcionario.
“Ta establece cu e fin di e medida rekeri ta pa haya propiedadnan of informacion cu ta di interes pa e investigacion, agenda, e-mailnan, mensahenan, video, audio, telefon mobil y cualkier otro medio audiovisual of documento fisico-informatico cu lo duna algun tipo di coordinacion entre e investigado”, e resolucion ta indica.
Wifredo Pedraza, abogado di Heredia, a afirma pa e medionan di prensa den e porta di su residencia cu esaki ta un ‘medida arbitrario’, producto di e ‘presion mediatico’ contra Humala y su casa. Tambe a bisa cu te e momentonan no ta conoci ‘elemento di conviccion’ cu a hiba e hues pa aproba e medida aki.
E inspeccion aki a produci despues cu na final di luna di juni a publica un serie di documento interno di Odebrecht, cu tabata revela e presunto pago iregular di 3 miyon di dollar relaciona cu e Gasoducto di Sur, cu a ser subasta durante su gobierno.
