Ayera a trata e caso Diamanta, un caso contra ex-politico di partido POR, Alan Howell, kende ta acusa di malversacion di fondo di fundacion di su partido.

E caso tambe ta involucra ex-tesorero di e fundacion, J. van Putten.

Segun portal online NoticiaCla a reporta, fiscal a haya cu Howell ta culpable di malversacion di placa di partido POR y falsificacion di recibo. Ta papia di malversacion di 197.404 florin; mientras cu Van Putten tambe a malversa mas di 100mil florin. E actonan criminal a sucede entre 2017 y 2021, tempo cu Howell tabata eherce funcion di Parlamentario y presidente di POR, cu Van Putten como tesorero.

Manera NoticiaCla ta reporta, Fiscal a indica cu Van Putten a yuda Howell malversa 197.404 florin, door di manda placa via facturanan falso pa cuenta priva di Howell. Origen di e placa tabata e pago cu POR tabata ricibi di Parlamento pa su fraccion, cual tabata casi 500mil florin. Segun fiscal, Howell a pasa e placa di partido riba su cuenta personal. Ademas, fiscal ta acusa Howell di a pone su abogado falsifica un cantidad di factura – cual Landsrecherche no por a haya ningun di nan durante investigacion. Sinembargo, fiscal a bisa cu e ta considera cu sospechoso Van Putten a wordo usa.

 

Howell a pidi fundacion di partido POR pa paga 65mil florin na Fondo Advisory, pero a resulta cu e compania aki no ta existi y no por haya nada di esaki na Departamento di Impuesto. Ta reporta cu difunto tata di Howell tabata tras di Fondo Advisory, y no un hurista manera tabata indica den documentonan. Ademas segun fiscal no a haya ningun factura. Tampoco a haya factura pa confirma declaracion di Howell, cu tabata paga su tata como consehero – mas bien, segun fiscal, a traha factura di pago despues di fayecimento di tata di Howell.

Tambe Howell lo a instrui Van Putten pa traha un factura di 18mil florin pa “Blue is Foundation”, cual lo a bay pa trahador di fraccion, R.L., sinembargo no por a indica unda e placa realmente a bay.

Fiscal tambe a indica cu F.B., di medio online E Arubiano, a haci trabaonan pa partido POR. Den esaki si tabatin pago cu a tuma lugar, pero segun F.B. a ricibi solamente 10mil florin, mientras cu facturanan di Howell a indica cu tabata mas cu 100mil florin.

Howell a presenta un carta di E Arubiano bisando cu a haya 22mil florin for di POR, cual segun fiscal, tabata pa demostra cu Howell a haci pago na E Arubiano. F.B. a declara cu despues cu a inicia caso contra Howell, el a acerca F.B. pa firma e carta en cuestion. Pero fiscal no ta kere cu Howell a paga F.B. e 22mil florin.

Como cu Howell a abusa confiansa di comunidad, fiscal a exigi 24 luna di prison, kitando e tempo di detencion preventivo, pa Howell. Pa Van Putten, fiscal a exigi 200 ora di trabao comunitario of 100 dia di prison, como tambe castigo condicional di 3 luna di prison cu 3 aña di prueba.

A pone beslag riba cuenta di banco di Howell pa algo mas di 49mil florin, a pidi pa esaki keda confisca por lo pronto, y a exigi un multa igual na e cantidad di placa confisca.

Awe mainta, abogadonan di e sospechosonan lo presenta nan defensa, manera NoticiaCla a reporta.