Ayera mainta fiscal a pidi hues pa sentencia Haime Trimon na 6 aña di castigo incondicional. Trimon ta traha na DOW y lo a mishi cu su propio nietanan pa un temporada largo den camber di e muchanan nan wela bou auspicio di ayudo cu huiswerk. Sentencia ta cay dia 3 di juli pa 8:15.

Tratamento di e caso a tarda poco mirando cu e hues mester a bin for di Corsou. Trimon tabata yuda un cantidad di mucha cu nan huiswerk, pero esunnan cu lo a abusa di nan ta su sobrinanan, ademas esunnan mas jong. Durante e abuso un tabatin 6 aña di edad, mientras e otro tabatin 9. Awe nan tin 8 y 11, respectivamente.

Un tercer mucha a entrega un keho na polis contra Trimon pasobra el a mira con e tabata abusa di e otro 2 mucha den camber di nan wela. Segun e denuncia, Trimon lo a haci varios acto sexual cu e muchanan, mientras e tabata kita su paña y di e muchanan tambe. E mucha cu a haci denuncia lo a wak un di e otro mucha su paña intimo riba cama na cierto momento, maske Trimon supuestamente tabata cera e porta na lock mayoria biaha cu e tabata yudando nan cu huiswerk pa preveni cu e muchanan mas jong stroba.

Telefon cu imagen y video pornografico

Durante e tratamento a bin afo cu Trimon tabata ricibi varios imagen y video pornografico riba su telefon, cual lo por a cay den man di e muchanan tambe. Segun Trimon e tabata ricibi esakinan di conocirnan, y cu lo ta posibel cu e muchanan lo a mira nan riba e telefon pasobra e tabata laga e muchanan hunga wega riba dje. Trimon a indica cu e no tabata spera cu e muchanan lo a bay den su WhatsApp y tabata confia cu nan lo no bay den dje ora cu lo a bisa nan pa no acerk’e. Hues sinembargo a pensa otro, bisando cu no ta un cuestion di confiansa, si no como adulto mester preveni un mucha pa yega na algo cu no ta corecto pa e yega na dje.

Acusacion di abuso anterior cu no a conduci na persecucion

Esaki ta Trimon su prome contacto cu husticia, sinembargo, 16 aña pasa a acus’e di e mesun cos cu awe e ta sinta den KIA p’e, pendiente sentencia. E acusacion ey no a conduci na un cargo penal, y segun Trimon esaki no lo tabatin ningun base. Pa hues sinembargo no ta importa si antes a bin un acusacion sin base, pasobra e cuestion actual ta si a abusa di e muchanan aki. E acusacion anterior no tin efecto riba esey.

Rapport psicologico

Tanto un psicologo como un psikiatra a evalua Trimon, ambos a bin na conclusion cu Trimon no tin ningun desorden psicologico cu lo por indica cu e no lo por a ta consciente completamente di kico e tabata haciendo. Psikiatra a indica cu e acusado no tin un trastorno pedofilico, pero hues a indica cu esey no ta laga afo cu e acusado lo por exhibi comportamento pedofilico. Psicologo a raporta cu si no ta sentencia Trimon siendo cu di berdad el a abusa e muchanan, tin chens halto cu e lo bira recidivista (comete acto castigabel atrobe).

Di parti di e mayornan di e victimanan, a pidi daño material na 5000 florin pasobra e mayornan no por a traha pa un tempo pa via di e dificultad di e noticia. E muchanan tambe a bay atras cu scol. Trimon a comenta riba esaki cu e por a spera esey, pasobra ya prome cu e tabata yuda nan, nan tabata hopi atras cu varios vak. P’esey Trimon tabata yuda nan. Fiscal sinembargo a pidi hues pa considera e daño inmaterial mirando cu no ta un daño material specifico, mas bien daño emocional. Fiscal a laga e suma na 5000 florin pa cada mucha.

Defensa

Abogado Mohamed a hiba Trimon su defensa dilanti. E esencia di e abogado su esencia ta cu e declaracionnan di e muchanan ta inconsistente. Segun e abogado e muchanan lo a declara cosnan contradictorio na varios momento durante e investigacion. Ademas, e abogado a haya cu no ta menciona suficientemente specifico ki tempo e abuso(nan) a tuma luga. Na varios ocasion polis ta haci pregunta adicional riba e mucha nan declaracion, pero nan ta indica cu nan no ta corda. Hues mes a indica cu den e dossier tin hende cu ta kere cu e muchanan ta gañado. Sinembargo e pregunta ta keda si den e caso aki nan ta gañando of no. Trimon na final a indica cu a haci varios menasa contra su bida y a haci varios comentario negativo riba medionan social desde cu nan a cer’e pa via cu ta tild’e di ta pedofiel.