(NLTimes) – Ministerio Publico (OM) ta exigi 7 aña den prizon contra Joel H. di 26 aña, conoci como Joey AK, pa secuestro, menasa y agresion. 8 otro sospechoso, di entre 22 pa 34 aña di edad, a ricibi exigencia di 4 pa 6 aña den prizon na corte di Amsterdam.
E caso contra e 9 sospechosonan aki cu ta conecta na e grupo di rap Zone 6 di Holendrecht segun OM, ta relaciona na e secuestro di e rapper Kobus L. Nan ta acusa di a atrae e victima na un car wash den Duivendrecht prome cu nan a oblig’e drenta un van. Ora cu el a drenta e van, aparentemente nan a horta e homber, menasa e homber cu un arma di candela y despues a agredi e homber. Ora cu e victima a reporta e crimen, el a bis cu ya caba el a ser agredi pa H. y co-sospechoso Ernst A. di 24 aña. Esaki a tuma luga na un show di kickboxing na Oostzaan den april di aña 2019. E causa tabata un debe di 500 euro cu Kobus tabatin cu H. despues di a perde un apuesta. 12 dia despues di e secuestro, el a ser ataca atrobe segun OM ora cu el a topa cu miembronan di e grupo na Bijenkorf.
Fiscalia a enfatisa den corte riba diabierna cu e eventonan no solamente tabatin un impacto masivo riba e victima sino tambe riba Holendrecht. “E sospechosonan ta bisando cu e bario ta pertenece nan y nan ta poniendo un mal ehempel pa e hubentud. Violencia ta ser aplaudi y cometi pa glorifica e status di e miembronan di Zone 6,” el a expresa.
Por ehempel, el a menciona e cantica Blijf Soldaat di Joey AK, graba dianan despues di e secuestro den cual e cantante ta bisa “Y awo ‘Holy’ ta dimi. Tur mucha cu bataya den e bario ta haya un ‘Roley’ for dimi,” e fiscal a splica, agregando cu ta “keda cla cu si bo traha pa e sospechoso y comete crimen, bo ta ser premia.”
El a acusa tur 9 sospechoso, kendenan a nenga of mantene silencio ante e acusacion y tin problema cu e hecho cu ningun di nan ta demostra cu nan ta repenti di a comete e delitonan di cual nan ta acusa.
