Ayera mainta fiscal di ministerio publico a exigi 12 aña pa Ryson Paskel, kende a hinca Camilo Sosa mata riba 2 di september 2018. Hues su sentencia lo cay riba 5 di juli pa 8or y 15.
Memey un sala yena cu mas o menos 38 persona – cu par di persona tambe riba di dos piso ta observa tratamento di e caso cual a shock famia Sosa mas cu 8 luna pasa – Ryson Paskel tabata defende su mes dilanti hues, cu ayudo di su abogado Chris Lejuez. E famia di e fayecido a conta cu un apoyo grandi, mientras famia di e acusado tabata poco mas modesto durante tratamento di e caso.
Asesinato of homicidio?
Fiscal, durante su splicacion pa bin na e castigo incondicional di 12 aña a expresa cu su persona tabata sinta hopi tempo ta pensa si den e caso aki ta trata di asesinato of homicidio.
‘Mi tabata hopi bezig cu e pregunta ey’, fiscal a conta par di minuut despues cu el a mustra e acusado imagennan di e sitio unda e hincamento a tuma luga, riba parking lot di Sand Bar. Di e manera aki fiscal kier a repasa riba e eventonan cu a transcuri prome cu e hincamento, mirando cu tabatin bringamento prome cu Paskel a hinca e hoben Camilo Sosa.
Pero repasa e eventonan tabata importante pa mas cu esaki: Mirando cu entre e bringamento y e hincamento tabatin un momento, di mas o menos 5 minuut di largura den cual e conflicto a caba pero Paskel a dicidi di drenta su auto, unda e tabatin un cuchiu, pa asina e bay confronta Sosa despues di e bringamento cual a envolve e acusado y e fayecido cu tres di su amigonan.
T’asina cu aki a hasta toca hurisprudencia di Hoge Raad, mirando cu fiscal mester a bay interpreta si 5 minuut despues di un bringamento ta suficiente pa un persona medita y pensa si nan ta sigui cu e accion cu nan tin pensa di haci of si ta trata aki di un decision haci den pura pa via di adrenalina.
‘Miho 10 aña dilanti hues cu 10 pia bou tera’
E acusado mientrastanto a apela riba su situacion personal relaciona cu su famia, mirando cu e relacion entre e y su tata pa hopi tempo no tabata bon y su mama a fayece.
Hues a puntra pa confirma si ‘pa via di fayecimento di bo mama bo a cay den un buraco preto’. Paskel a contesta cu el a experiencia hopi trauma den su bida, y e ta compronde cu e mester ayudo. Tin varios rapport di Reclassering y di psicologo cu ta apoya esaki, unda ta menciona cu Paskel mester terapia pa regula su agresion.
Sinembargo fiscal a expresa cu ‘if you can’t do the time, don’t do the crime’. El a referi na Paskel su declaracionnan cual tabata duna sin emocion. Paskel mientrastanto a expresa cu e ta sinti nan, pero nan ta keda paden. Fiscal mientrastanto a duda esaki, na cual momento famia y conoci sinta na di dos piso di e sala a bisa ‘no ta na abo pa determina esey’. Fiscal a menciona alabes un potret di Paskel cu a aparece riba media social mientras tabata na KIA bisando ‘miho 10 aña dilanti hues cu 10 pia bou tera’.
Famia Sosa: ‘Satisfecho cu exigencia di fiscal’
Raquel Sosa, mama di e fayecido mientrastanto despues di e caso a declara na prensa cu nan ta satisfecho cu exigencia di fiscal.
“Specialmente e aspecto incondicional pasobra na Aruba ta conoci cu ta pidi castigo di 15 aña mientras ta baha esaki pa 10, ta pidi pa 10 y ta baha te na 5. Pues den e aspecto ey nos ta contento, pero claro nos nunca lo haya nos yiu bek.”
Despues cu e echo a tuma luga, e famia tabata den shock. Fiscal mes a menciona cu famia Sosa a yuda busca Paskel mirando cu el a huy di husticia pa 2 luna largo. E famia a haci un peticion na fiscal pa reparacion material di 15 mil florin y reparacion inmaterial di mas o menos 34.5 mil florin.
