Fiscal ta exigi un castigo di 10 aña di prizon pa e dama di nacionalidad Chines acusa di mata director di Serlimar Richard Fingal aña pasa. Fiscal ta bisa cu e no ta kere den e storia di defensa propio anto ta describi e dama como un ‘cold blooded person’.
E caso a wordo trata ayera den corte anto hues lo duna su veredicto riba 21 di april proximo. E sospechoso ta wordo acusa tambe di menasa un persona den KIA algun tempo pasa. Esaki tabata un caso cu seguramente a shock comunidad di Aruba completo aña pasa. E dama inicial M.T. ta acusa di tuma bida di un persona riba 11 di juli 2016 door di intencionalmente y cu forsa, hink’e varios biaha cu un of mas cuchiu na su curason, pulmon, nek y garganta, como tambe un sla cu martiu na su frenta.
23 staca di cuchiu
E victima a ricibi 23 staca di cuchiu anto 4 corta. E hincanan na su pulmonnan y curason ta locual a causa su morto. Fiscal tabata kier pa hues pospone e caso ayera pasobra tin ainda informacion cu e instituto forensico di Hulanda NFI a saca for di celular di e victima, cual a yega Aruba bek 22 di maart y ainda tin cu wordo analisa.
E informacion aki no a forma parti den loke a wordo trata ayera, pero ta posibel cu for di e analisis ta sali elementonan cu ta indica premeditacion. Tabata papia cu posiblemente sr. Fingal lo mester a bay fia e dama placa (supuestamente un suma di 24.400 florin pa inverti den negoshi) pero segun declaracion di e dama den corte, esaki no ta berdad.
‘Cold blooded’
Fiscal a describi e dama como un persona di sanger friu pasobra e no a mustra mucho emocion ora cu polis a bin atende cu e caso. E tabata cubri na sanger, pero e tabata basta calma. Fiscal ta señala cu e dama a cambia algun elemento di su storia varios biaha. Fiscal a pidi hues tambe pa rechasa e apelacion riba defensa propio. E sospechoso no a duna un motibo of splica e rason pakico e victima mester a muri. Segun Ministerio Publico: “E no a merece, no pa e supuesto avancenan indesea cu e lo a haci, manera e sospechoso ta bisa.”
Morto ‘horibel’
Sr. Fingal a muri un morto horibel segun descripcion di fiscal, cu heridanan na su pecho, barica y brasanan. E sla riba su cabes cu martiu tambe a causa hopi daño. E luga tabata completamente na sanger. Fiscal a mustra un video den corte unda bo ta mira e porta di glas ta sacudi. Esaki tabata e momento cu e victima a ranca e porta cu forsa pa purba habri e. El a sufri hopi prome cu el a muri anto sclama pa su bida. Segun fiscal, testigonan a tende sr. Fingal ta yora: “Mi tin famia!” y tambe gritando pa yudansa. Fiscal ta bisa cu e no ta kere den e storia di defensa propio pasobra no tin indicacion di violencia segun inicio di storia di defensa.
Sr. Fingal aparentemente solamente a caricia y brasa e dama, anto e no a gusta e manera con el a cuminsa papia cu ne. El a brasa y wanta e man di e dama, cuminsa bis’e cosnan manera “bo mester purba un Arubiano, nos ta mas dushi”. A inicia un confrontacion cu a bay for di man.
Niun herida
E dama no tabata tin ningun herida riba su curpa. Mas bien indicacion cu e tabata tin mas forsa cu e victima, por a scapa, gara telefon y bay pafo di e luga, si e tabata tin miedo manera cu el a indica, pero no a haci e. Fiscal a señala cu no tabata tin ningun indicacion cu un masashi a tuma luga of cualkier otro tratamento, mas bien un tipo di ‘get together’ cu bebida. Locual ta sospechoso tambe segun fiscal, ta cu sr. Fingal a gaña su famia y bisa cu e ta bayendo un tipo di evento e anochi ey.
Defensa
E dama M.T. tabata conoce sr. Fingal pa varios aña caba y de hecho tabata practicamente bisiña di dje na Calbas. E y e dama a palabra cu nan lo topa e dialuna anochi ey parti atardi, pero despues a palabra pa 7or na e sitio na Piedra Plat. Segun e prome declaracion cu Bon Dia Aruba a haya aña pasa for di abogado Lejuez, pa evita cu mas cliente lo a bay na e sitio, e dama a pidi sr. Fingal pone su auto na Bright Bakery. Sin embargo el a sugeri pa e dama bin busk’e na Four Seasons anto el a laga su auto eynan para bao di un palo di kwihi. E dama a considera e tratamento aki como un excepcion solamente pasobra nan ta amigo anto e normalmente no tabata duna masashi na hende homber.
“El a yega di haci e solamente pa Chines pero ora cu e Chines bin cu e casa,” sr. Lejuez ta bisa. Cos a cuminsa bay robes ora cu sr. Fingal a cuminsa papia cu e dama, 30 pa 40 minuut despues di e tratamento, bisando e cu “e ta hay’e bunita, cu e stim’e y pa hopi caba.” Aunke cu e dama tabata bis’e pa stop, Sr. Fingal a continua te ora cu el a tene e dama di tal forma na su curpa cu e dama no por a move su man. Akinan un confrontacion a start entre nan dos. E dama a pasa man pa un cuchiu cu tabata cerca y hinca e victima na su bariga. Sr. Fingal a rabia y segun e dama, menas’e y bis’e “awo si mi ta bay mata bo!”. Akinan e confrontacion a sigui y e dama tabata practicamente bringando pa su bida na e momentonan aki.
Ambos ta bringando pa kita e cuchiu anto e ultimo staca a resulta pa motibo cu nan a slip, y sr- Fingal su curpa a pusha riba e cuchiu. Akinan el a cuminsa sangra masha hopi mes, bisando algun cos cu e dama ta bisa cu e no por a compronde. E dama despues a sali pafo den shock y acudi na un persona pa ayudo.
Otro acusacion
Na februari 2017, e sospechoso a wordo acusa di menasa un persona cu morto den KIA. E ta wordo acusa di coy un chapi den su man anto menasa un otro detenido cu morto. Segun abogado Lejuez: “E berdad ta cu pa ocho luna cu e ta den KIA caba, e persona aki a keda cherche y insult’e. E tabata keda den su cel anto no tabata sali te un dia cu su buchi a yena, el a coy un chapi anto bisa e detenido: si bo kier mata mi, bin mata mi. Pasobra e persona tabata menas’e cu morto, pest e y no tabata lag’e na pas papiando constantemente di su caso.”
Declaracion di yiu di sr. Fingal y sospechoso
Ambos e yiu muhe y e sospechoso a duna un corto declaracion den corte. E famia a bin hunto y keda durante henter e caso cu a dura como ocho ora largo. E yiu muhe di sr. Fingal a expresa cu su tata no tabata un persona agresivo y cu e no a merece di a muri asina. “Mi ta exigi husticia,” el a bisa. E dama Chines tambe a bisa algun palabra y reacciona na declaracion di e yiu muhe: “Mi nunca lo a pensa cu mi lo ta den un sala di corte awe. Ami tambe tabata tin hopi confiansa den Richard, te awe mi no ta compronde pakico el a actua asina. Nunca lo mi a imagina cu e situacion lo a bay asina leu pasobra a pesar cu e tabata un bon of mal hende, nunca mi intencion tabata ta pa mi mat’e.”
