Fiscal general di Brasil, Rodrigo Janot a pidi na corte supremo pa investiga nuebe minister di gobierno di Michael Temer cu a keda acusa di haya soborno for di Petrobras, y cu a ser acusa pa ex directiva di grupo Odebrecht, medio local a informa. Entre minister cu ta acusa ta Blairo Maggi (Agricultura), Aloyisio Nunes (Relacion Exterior), Eliseu Padilha (Presidencia), Moreia Franco (Secretaria General di Gobierno), Bruno Araújo (Ciudad), Gilberto Kassab (Ciencia y Tecnologia) y Marcos Pereira (Desaroyo).
Janot a pidi pa habri un investigacion contra dos minister di gobierno di Brasil, pero te na momentonan aki no a revela nan nomber ainda.E hues instructor di e caso aki ta Edson Fachin, cu a haya e peticion for di fiscalia pa cuminsa cu investigacion contra 83 politico, cu tin inmunidad y corte supremo ta e unico organismo cu por investiga nan, pasobra nan ta politico den ehercicio.
Siman cu a pasa fiscalia di Brasil a manda un lista cu tur solicitud pa corte supremo pero te diamars ultimo e lista a yega na man di Fachin, hues supremo di Tribunal Federal di Brasil.E magistrado mester dicidi si ta autorisa of no un investigacion di banda di fiscalia pa tur politico cu ta privilegia bao un proceso di inmunidad politico. Janot a haci e solicitud aki despues di analisa durante un luna e testimonio 77 ex directiva di Odebrecht a duna, den un acuerdo di cooperacion hudicial.
Hunto cu 83 peticion di investigacion cu ta existi caba, e fiscalia a trece otro solicitud pa habri 211 investigacion mas den husgado di prome instancia, cu ta afecta persona cu tin inmunidad, hunto cu otra 7 cu ta bay den archivo y 19 medida special manera un solicitud pa agrega e confesion di directiva di odebrecht den otro investigacion.Fiscal di Brasil a sugeri pa cuminsa un investigacion contra mas di 10 gobernador y autoridad, entre nan ex presidente Luiz inacio Lula da Silva (2003-2010) y Dilma Rousseff (2011-2016).
E lista Janot cu ta bao secreto hudicial y a move e base di politica na Brasil pasobra ta un gran cantidad di politico cu a resulta envolvi den caso ey, entre miembro di gobierno, diputado, senador y gobernador, di banda di partido oficial y di partido di oposicion tambe.E di dos lista Janot ta 3 biaha mas grandi cu e prome lista cu a ser presenta na maart 2015, na momento cu fiscal general a solicita un investigacion pa mas di 50 politico y cu te na momento aki ningun di nan a keda condena.
