(AP) – Francia su fiscal anti teror a bisa diamars cu un extremista Islamico ta sospecha di a declara lealtad na IS prome cu el a staca fatalmente un docente na un scol siman pasa.
E fiscal, Jean-Francois Ricard, a bisa cu polis a haya un grabacion den e sospechoso su telefon. Den e grabacion aki e sospechoso a declara su lealtad na Estado Islamico (Islamic State) y a expresa su “odio pa Francia, e pueblo Frances, democracia y e educacion di cual el a beneficia den nos pais.”
E supuesto sospechoso ta un ex studiante di e scol na Arras. E docente a ser staca fatalmente den su nek y 3 otro persona a keda herida den e asalto, cual a haci cu e Francesnan a aumenta su nivel di alerta pa teror y a despacha extra siguridad. E fiscal a papia na un conferencia di noticia y no a tuma preguntanan.
Ricard a bisa cu poco prome cu e atake, e sospechoso tambe a graba un video di su persona dilanti un memorial di guera. Den e video, e sospechoso a “keda ataca, den su propio palabranan, e balornan di e Francesnan. El a expresa algun puntonan di bista particularmente menasante,” e fiscal a bisa.
Dos di e sospechoso su miembronan di famia, ademas di e sospechoso mes, ta enfrentando acusacion formal relaciona cu terorismo segun Ricard. Nan a inclui e sospechoso su ruman homber di 16 aña ken ta sospecha di a provee un cierto “cantidad di sosten” pa e atake, di ta altanto di su ruman homber su radicalisacion y di a conseha su persona con pa lidia cu cuchiu, segun e fiscal. E otro ta un primo cu aparentemente tabata altanto cu posiblemente ta den plan di un crimen pero no a haci nada pa para esaki.
Polis a detene en total 13 persona pa interogacion relaciona cu e investigacion aki desde diabierna, sinembargo 10 di e personanan aki a keda liber di cualkier acusacion pa awo segun e fiscal.
