Diamars un fiscal a adverti tocante e posibilidad di fuga di ex-presidente di Peru Ollanta Humala y su casa Nadine Heredia, ambos den un investigacion pa presunto labamento di placa.
Diamars German Juarez Atoche, funcionario hudicial di Peru a solicita na husticia un modificacion di e reglanan di conducta cu ta impone na Humala y su casa, na momento cu el a mustra documento hudicial yama “poder” (volmacht), cu e matrimonio Humala a duna na un famia cercano, pa por firma sin ningun limitacion cualkier tramite y biaha pa exterior hunto cu yiunan di e ex- pareha presidencial di Peru.
“Ta existi e posibilidad cu Ollanta Humala y su casa Nadine Heredia por bay for di Peru.” Juarez a bisa den su escrito di acusacion dilanti di Hues Richard Concepcion Carhuancho. Hues Carhuancho tin un plaso te awe pa resolve e solicitud cu Fiscalia a presenta den e huicio aki.
E podernan cu Humala y su casa a duna na un persona di su famia a ser tramita 22 di november cu a pasa. Juarez a bisa cu e poder aki “ e pareha ey ta prepara e caminda pa un posibel fuga for di Peru. E sospecho ta asina pasobra e poder cu nan a duna Rosa Heredia, prima di Nadine Heredia, ta otorga e posibilidad cu e por bay for di Peru hunto cu yiunan di e pareha presidencial, mientras cu si cualkier di nan, Ollanta of Nadine por bay exterior hunto of separa, Rosa Heredia por Sali trankilamente cu e yiunan for di e pais.”
E pareha ta bao investigacion desde aña 2015 pa ricibi miyones di dollar no justifica y cu nan a usa pa campaña di presidencia di Humala na 2006 y 2011. Fiscalia ta sigura cu e placa a ser manda pa Peru di banda di gobierno di Venezuela, tempo cu Hugo Chavez Frias tabata presidente entre 2005 y 2006, y ta trata tambe di placa di e empresanan Odebrecht y OAS di Brasil na 2011. Na Peru pa e delito di labamento di placa por ricibi un castigo entre 8 y 25 aña di prizon.
