(AP) – Actor ganado di Oscar Kevin Spacey tabata un predador di hende homber y e comportamento aki a escala di mishimento leve na mishimento hostil y mas segun fiscal a conta hurado durante Spacey su huicio di asalto sexual na London.
Spacey ta “un homber cu no ta respeta espacio personal, un homber cu ta gusta haci otronan sinti incomodo y sin poder. Un bully sexual,” fiscal Christine Agnew a bisa den su argumento di apertura. “Su metodo preferi di asalto ta aparentemente gara otro homber su parti priva agresivamente.” Cu 63 aña di edad, Spacey a declara su mes inocente den e decenas di acusacionnan cu ta trata 4 hende homber y acusacionnan cu ta for di 2001 te na aña 2013, ora cu e tabata traha na London Old Vic Theatre. E acusacionnan ak ita inclui asalto sexual, asalto indecente y causa un persona haci actonan sexual sin consentimento.
E peso di e huicio aki ta pisa pa e actor Americano. Un sentencia lo manda su persona prizon mientras cu si retira e cargonan den su contra, e por bolbe back na su carera.
Abogado di defensa Patrick Gibbs a bisa cu Spacey a nenga tur acusacion cu ta trata actividad sexual sin consentimento y a pidi e hurado puntra nan mes mientras nan ta tende e evidencia si tur esaki a tuma luga mientras cu e tabata cu e hombernan aki. El a sugeri cu e victimanan tabatin otro motibonan y cu Spacey a laga su mes habri pa oportunistanan ora cu el a revela cu e ta gay den aña 2020. “Kico su contexto a ser cambia cu un plan macabro? Gibbs a comenta. “Kico a ser inventa of cambia, dicon y den ki tempo. Tur e acusacionnan aki a pasa hopi tempo atras.”
Segun Gibbs, e hurado lo tende berdadnan, berdadnan na mita, exageracionnan y “hopi mentira.”
E actor a ehecuta e rol di director artistico di Old Vic theatre for di aña 2003 te na aña 2015. E 4 hombernan acusando Spacey di asalto sexual, awo cu 30 pa 40 aña, no tabata conoce otro, sinembargo “tur tabatin e mal suerte di atrae su atencion” segun Agnew.
Spacey su carera a sufri golpinan fuerte ora cu acusacionnan den su contra a surgi durante e movemento #MeToo. A retira su personahe for di e serie politico di Netflix “House of Cards,” unda el a hunga un rol principal di Frank Underwood. El a ser corta tambe for di e pelicula completa “All the Money in the World.”
Un hurado di 9 hende homber y 5 hende muhe lo dicidi su futuro durante e huicio di 4 siman na Southwark Crown Court, unda e ta identifica pa su nomber completo Kevin Spacey Fowler.
