Diabierna mainta den corte a tuma luga tratamento di un caso hopi tristo y lamentabel, un caso di abuso sexual di menor. Den e caso aki, e sospechoso E.R.d.M. ta ser acusa di violacion di un menor bou di 12 aña di edad cu abuso di funcion den e periodo escolar di 2014 te 2016, y di ta den posesion di pornografia infantil.

E caso aki ta uno lamentabel no solamente pa e hecho cu ta trata di un caso di violacion di un mucha menor di edad, pero tambe pasobra e sospechoso cu a comete e acto tabata un meneer di scol na un scol basico na Savaneta y tabata, meneer di gym di e alumno y ademas tabata coach un ekipo di volleyball di mucha homber.

E accionnan lamentabel a sucede tempo cu e mucha homber tabata menos cu 12 aña di edad, y aworaki e victima tin 17 aña di edad. Apenas aña pasa e victima a confesa na su mama tur loke a sucede y asina e mama, hunto cu su yiu, kennan actualmente ta biba na Hulanda, a biaha pa Aruba pa asina pone un denuncia formal contra e sospechoso.

Cuminsando cu e tratamento di e caso hues a haci algun pregunta na e sospechoso basa riba e investigacion cu a ser hiba.

Un di e acusacionnan contra e sospechoso ta cu ta den posesion di pornografia infantil, potretnan caminda mucha hombernan, algun di nan su alumnonan di scol y di ekipo di volley, ta sali sin t-shirt, sinta riba scochi di e sospechoso, un sin carson y hasta un video caminda por mira parti di un parti intimo di un hoben tambe.

Ora cu hues a puntra e sospechoso tocante e potretnan aki, e sospechoso a indica cu e ta un persona cu ta gusta saca potret y como cu e muchanan ta train volleyball, hopi biaha nan sa kita t-shirt door di e calor etc.

Bayendo specificamente riba e potret di e mucha homber cu a sali cu su carson abou, el a bisa cu net na e momento cu e ta bay saca potret e mucha homber ta esun cu a baha su carson y pesey a e potret a sali asina.

Hues tambe a puntra e sospechoso si e ta haya ta bon pa mishi cu e mucha hombernan of pa laga e mucha hombernan sinta den su scochi/riba rudia, na cual e sospechoso a indica cu esey ta simplemente parti di loke ta sucede ora di train of hunga volley.

E acusacion principal ta encera cu e sospechoso a comete actonan sexual y hasta a penetra e mucha homber menor di edad den kleedkamer na scol despues di les di gym.

E sospechoso E.R.d.M. a nenga rotundamente tur acusacion den su contra y a declara cu su persona nunca a yega di mishi cu e victima ni cu ningun otro mucha. El a sigura cu e no ta “doe mee” na pornografia infantil y ta sigura cu e potretnan cu a ser haya riba su computer di cas no tin nada di haber cu pornografia infantil y tampoco ta sexualmente stimulante p’e.

Na momento cu fiscal di Ministerio Publico (OM) a haci pregunta na e sospechoso, el a puntr’e directamente si e no ta “doe mee” na pornografia infantil y si e potretnan ey ta simplemente potret y no tin ningun nificacion, pakico despues di tanto aña ainda nan ta den su posesion.

Fiscal tambe a puntra e sospechoso si e ta haya ta bon pa un adulto, y den e caso aki un meneer di scol ta amigo cu muchanan menor di edad y cu ta su alumno. E sospechoso a contesta cu e no ta wak nada malo cu esey y cu muchanan tabata bin su cas pa e yuda nan cu diferente cos, sea ta di scol of di volleyball.

Adicionalmente fiscal a menciona cu de e investigacion a haya combersacion entre e sospechoso y un menor di edad cu tabata sexualmente explicito, y a puntra e sospechoso tocante esaki, na cual e sospechoso a contesta cu e ta considera e mucha homber un amigo cu asina nan ta “haci wega” y cu nunca tabatin ningun intencion su tras.

Depsues cu fiscal a termina di haci pregunta na e sospechoso un di e momentonan mas dificil y emocional den corte a tuma luga na momento cu e mama di e victima cu a pone denuncia a usa su derecho pa dirigi su mes na hues.

Cu lagrima na wowo y cu un voz cu por a scucha e dolor y tristesa di e mama, el a cuminsa elabora riba e trauma cu e actonan cu e sospechoso a comete acusa pa no solamente su yiu, e victima, pero pa henter e famia.

El a indica cu pa motibo di e trauma pisa aki su yiu a purba di comete suicidio no un, ni dos, ni tres, pero cuater biaha.

E mama di e victima a sigui conta cu su yiu, ken tabata un mucha homber cu tabata miho di klas, un mucha homber trankil y alegria a cambia bira un mucha cu ta biba solamente den angustia y un tristesa interminabel.

Pa motibo di e trauma enorme cu el a pasa e victima ta den tratamento psicologico y ta evaluando e posibilidad pa intern’e den un facilidad psicologico pa asina por brind’e e miho ayudo posibel.

El a expresa cu como mama e ta un dolor increibel pa mira con su yiu ta lucha diariamente cu su e retonan cu e trauma inimaginabel aki ta trece cune.

Den su rekisitorio fiscal di OM a sigura cu aunke ta trata un caso cu ta involucra solamente dos persona, e victima y e sospechoso, sa pasa cu ta dificil pa respalda cu otro pruebanan, pero den e caso aki si tin prueba, considerando e potretnan cu a haya den e computer di e sospechoso, e combersacion cu otro mucha homber y ademas testimonionan di testigonan cu ta cuadra cu loke a victima a bisa den su declaracion.

OM ta apunta cu e caso tin suficiente prueba y evidencia pa sostene e declaracion di e victima, cual a segura ta consistente y confiabel.

Teniendo na cuenta diferente aspecto di e caso y investigacion, fiscal di OM a pidi un castigo di seis aña di prizon incondicional, kitando locual e sospechoso a sinta caba den KIA. Ademas el a pidi un prohibicion pa eherce su profesion, cual segun ley por ta maximo cinco aña adicional na e tempo di castigo cu ta ser pidi, cual lo bira 11 aña di prohibicion pa e sospechoso eherce su profesion.

Hues lo repasa e caso completo y e demanda di Ministerio Publico. Den algun dia lo duna su veredicto final tocante kico lo bira e castigo definitivo pa e sospechoso.