44 miyon euro scondi den paki di galiña (kiprollade) a bay probablemente den 8 container riba transportacion for di e ciudad Hulandes Roermond pa Aruba. Y probablemente pa su destinacion final: e famoso gang di mafia Chichi.
Esaki a bin dilanti den un di casonan mas grandi di labamento di placa na Aruba. Ayera e sospechoso Ramon Helgers (un di e doñonan di e restaurant famoso na Aruba, Madame Janette), Rupert Genser y José De Sousa a presenta dilanti hues atrobe. E biaha aki pa e tratamento di e caso mes y despues di un tardansa di mita dia pa motibo cu nan abogado no por a bin for di Corsou (vuelo a keda cancela), nan a scucha fiscal exigi un castigo di 5 aña di prizon contra nan. Nan lo sinta menos pasobra e castigo aki ta min e tempo cu ya nan ta cera.
Segun investigacion husticia ta sospecha cu un total di 10 container cu e placa scondi den e galiña a bay di Roermond pa Aruba. Esaki fiscal ta calcula a base di prueba manera buki cu nan a haya cerca e sospechoso Genser. E tabata nota den e bukinan e suma y cantidad. Y tambe cuanto nan ta cobra cada biaha. Sr. Helgers tabata cobra 4% y sr. Genser y sr. De Sousa hunto 4%.
Tin un otro sospechoso den e caso aki, esta Henny van Rey. E ta e ruman di e politico Hulandes cuestionabel Jos van Rey. Husticia na Aruba a detene Henny van Rey pero el a wordo traslada pa Hulanda unda e mester responsabilisa su mes dilanti hues tambe.
E sospechoso De Sousa a logra di huy pa Venezuela pero finalmente cu a logra di detene cu ayudo di Interpol. Pa motibo cu Aruba no tin un colaboracion cu Venezuela el a tuma hopi tempo pa husticia Venezolano a entreg’e. El a keda 9 luna den prizon na e pais Latino Mericano.
Kita miyones di nan
Fiscal tambe a pidi hues pa kita e ganashi di e sospechosonan. E suma exigi pa sr. Helgers ta core den 1.5 miyon florin. Di sr. Genser husticia kier kita 670.000 florin. Na sr. Genser su cas un polis a sak door di e blafon y asina nan a haya e placa scondi di 280.000 euro. Husticia tambe a confisca e placa aki y lo no duna esaki bek. Di sr. De Sousa fiscal kier kita 1.4 miyon florin. E placa aki ta bay den un fondo special pa combati criminalidad.
Husticia no a pone man riba e 44 miyon euro. Esaki ta un calculacion cu fiscal a haci a base di e prueba. Ta solamente un container cu placa scondi cu husticia a logra di pone man riba dje, y esey tabata riba e dia 22 di juni 2015. Den e container nan a haya 2.8 miyon euro y fiscal tambe a pidi hues pa declara esaki ‘verbeurd’(pues lo kit’e permanente como parti di e castigo).
E caso a cuminsa lora na december 2014 ora e team di recherche RST a pone e sospechosonan Helgers y Genser bou tap riba peticion di autoridadnan Mericano. Merca tabata haci un investigacion di labamento di placa. E sospecho ta cu tabatin un trayecto di labamento nobo coriendo for di Roermond Hulanda pa Aruba.
Autoridadnan Arubano tambe a cuminsa investiga y paralelo esun di Hulanda tambe. Na Aruba e investigacion a haya e nomber Tunis. Esun na Hulanda 26 Fluor. Y asina nan a logra di gara e container riba 22 di juni 2015.
E sospechosonan no kier a coopera cu husticia. Y pa sr. Genser e no ta e prome biaha cu e ta deteni pa labamento di placa. Den un otro caso e tabata sconde e placa den muebla.
Ayera no por a logra di termina e tratamento di e caso. Pues esaki lo sigui diamars otro siman ora e abogadonan lo presenta nan defensa.
