Diaranson mainta, sindicato STA a firma contract colectivo CAO pa compania New India Assurance. Un CAO cu lo tin duracion di 5 aña. Un contract cu ta bisa cu ta bon hinca den otro pa beneficio di e trahado.

Presidente di sindicato STA, Diego De Cuba a bisa cu a ‘haya prudente’ pa firma un contract di 5 aña. Ademas a splica cu den e CAO tin tur ingrediente cu un contract mester tin. Aparte di e trahado su ‘performance bon den trabou’ nan lo conoce un aumento.

E ta bisa cu no ta inusual cu un CAO tin un duracion pa 5 aña, ya cu ‘esey ta e maximo’. Nan a mira cu contract ta bon, pero si den transcurso di aña nan considera cu situacion por presenta cu por trece dificultad pa operacion di e compania, nan lo sinta na mesa bek, y ‘esey ta normal’.

Tambe tin e parti di vakantie uitkering, nan ta haya un bonus. Tambe tin un premie cu lo haya na comienso di aña. De Cuba a duna di conoce cu tambe lo bin nobo beneficio pa e yiu di trahado, den forma di ‘placa pa cada yiu’. Apart di esey tambe tin pago di dia liber manera casamento, entiero y nan lo conoce un bonus (voucher pa shopping) di 500 florin na fin di aña, caminda e trahado por cumpra locual e kier.

De Cuba ta expresa cu ta un CAO bon hinca den otro y ta contento di con e negociacion a bay lihe. “Mi ta kere ora tin bon boluntad di parti gerencia di compania, sindicato y delegado ta yega na concretisa un bon contract pa trahado.”

Den total tin 29 trahado den e compania. Sinembargo e ta bisa cu New India Assurance ta un compania stabiel, aunke tin turbulencia ‘por sobrevivi’. Cu esaki e ta referi na medida cu gobierno lo por bin cune.

Esey por afecta entrada di compania, pero te ainda, De Cuba ta splica cu no sa con leu esey ta y lo keda concretisa con hopi e por afecta e compania. “Esey ta cosnan cu a papia riba dje, ta di acuerdo cu esey. Ta algo cu nos tin cu hinca na varios CAO cu nos a firma tambe. Pero cu bon entendimento ta logra y ta contento cu esey.”

Nunca ta facil pa cera un contract colectivo y ta tene esaki na cuenta. Pa locual Banco Central a bisa cu cost of doing business (e costo di haci negoshi) a aumenta, pero tabata facil pa cera un CAO pa e trahado bay dilanti y busca beneficio pa nan. “Den caso aki, tur trahado a bay acuerdo cu locual tin.”

E ta enfatisa si cu ta keda na cada trahado pa cumpli cu nan deber manera mester ta, pa motibo cu un CAO no ta un banda so, pero e ta un situacion cu e trahado tin cu duna di su banda. “Ta felicita gerencia, empleado pa e tremendo logro cu nan contract cu lo dura 5 aña.”

Kaveri Raghunath, managing director di New India Assurance, a expresa cu ta contento con henter e proceso a bay pa yega na acuerdo cu tur partido a compronde. Na un manera profesional manera semper y varios punto cu a concretisa den CAO.

E reto di mas grandi, segun Raghunath tabata e parti medida cu gobierno lo por implementa, cu lo bin cu rekisito cu mester tene na dje como compania, algo cu por bira un reto.

Sinembargo tur esey ta e costo di haci negoshi, cu no ta turbulencia interno, pero mas tanto externo cu nan tin cu deal cune. “Esaki ta di 3 CAO cu a firma, e otro tabata di 3 aña y tur cos a cana ‘netjes’. Tin acuerdo cu si tin cambio lo sinta na mesa y tum’e positivo cu tur cos lo bay bon y lo enfrenta conhuntamente cu STA y trahadonan.”