“Nos ta bibando un etapa nobo di nos historia. Un etapa unda uni nos lo por alcansa cualkier meta, supera cualkier obstaculo y haci di nos nacion e pais cu semper nos a soña, un pais den paz…Ban habri e porta di futuro”, asina presidente di Colombia Sr. Jose Manuel Santos a bisa prome cu a firma e acuerdo di paz hunto cu comandante di Farc, Rodrigo Londoño, alias “Timochenko.
E acto historico aki a tuma luga na e ciudad colonial di Cartagena den presencia di Secretario General di ONU, Ban Ki-moon y varios dignatario di Latino America y Caribe.
Comunidad internacional a compromete su mes cu e proceso di paz na Colombia, te hasta Hulanda lo duna su contribucion pa e acuerdo aki por bira sostenibel. Ta asina cu Merca lo duna 33 miyon dollar destina pa kita e minanan explosivo cu a wordo dera den diferente region unda Farc tabata presente. Mientras cu Noruega a anticipa un contribucion di su gobierno pa 22 miyon dollar.
Pero tin un cifra di 80 miyon dollar cu lo wordo completa cu recursonan economico di nacionnan manera Hulanda, Canada, Reino Uni, Suisa, Suecia, Hapon y Israel, entre otronan. E ayudo no solamente ta economico sino cu lo bin cu un serie di acuerdo pa stimula e produccion agricola den e teritorio, unda ehercito di Colombia tabata combati Farc. Paisnan manera Chile, Argentina y Uruguay lo aporta cu capacitacion di gruponan cu lo yuda desmantela e minanan explosivo.
