Finanzas, enseñansa y corupcion, temanan cu a resalta durante debate politico di Camara di Comercio

Diahuebs ultimo a tuma luga e debate politico organisa pa Camara di Comercio (KvK) conhuntamente cu Universidad di Aruba na unda 10 lider politico tabatin e oportunidad pa contesta pregunta, debati y presenta nan ideanan di plan pa e siguiente periodo di gobernacion.

Un di e topiconan cu a resalta mas durante e debate tabata finanzas y e famoso surplus. Varios politico a toca e tema aki na unda mayoria a indica cu den caso cu nan logra drenta gobernacion nan lo elimina BBO y bin cu BTW y usa e surplus pa duna back na comunidad.

Relaciona cu esaki, despues di debate durante su declaracion na prensa prome minister demisionario y lider di partido MEP, Evelyn Wever-Croes, a splica pakico a scoge pa puntra lider di partido PPA, Otmar Oduber, kico ta su plan ora e ta bisa e ta bay elimina BBO y bin cu BTW.

El a splica cu como minister di e gobierno actual (awor demisionario) a purba haci esaki na 2022 pero a encontra dos reto. Uno tabata cu e partner den coalicion no tabata kier y dos ta cu cierto comerciante a laga sa cu no ta bay baha e BBO y bin despues cu BTW, pero pone nan dos hunto.

El a indica cu el a keda sorprendi cu varios politico a papia di elimina BBO, pero no ta tene cuenta cu e ta un proceso y cu mester tin algo cu ta bin den su luga cu ta keda mantene e balansa pasobra si no e finanzas no ta bira sostenibel.

Na mesun momento e mandatario a resalta cu e ronde di haci pregunta na otro politico tabata hopi interesante pasobra ta duna oportunidad na e politico di convence otro di su posicion. “Esey ta bon pasobra bo ta debati cu otro. El a duna claridad y bo ta compronde miho kico un partido kier,” el a indica.

Kedando den e mesun topico di finanzas, un aspecto cu a resalta ta cu politiconan a papia di inverti e surplus back den comunidad, pero ningun a menciona e acuerdo cu Hulanda cu ta limita e espacio pa inversion. Den su declaracion na prensa minister demisionario di Finanzas, Xiomara Maduro, a señala cu esey ta un parti cu nan ta laga afo di e discusion.

El a splica cu e ley di LAft ta existi desde 2015 caba y a ser adapta aworaki na fin di 2023 y e normanan financiero nobo a bin aden. Un di nan ta cu presupuesto di pais mester tin tur aña un surplus di 1%. El a indica cu ya caba pais Aruba a bin ta registra un surplus di 1% y di mas di 1% den e presupuesto 2023, 2024 y pa 2025 ya a entrega esaki y ta conta tambe cu un surplus

Minister Maduro a indica cu e surplus aki den e ley ta destina caba cu e tin cu bay na debe y e loke ta bin extra riba e 1% ey tambe ta destina mita pa debe y otro mita na inversion. “No ta asina cu e surplus por ser gasta den locual bo pensa cu bo kier bay gast’e,” el a remarca.

Pa loke ta e tema di diversificacion di economia, e mandatario a splica cu den esfuerso pa diversifica economia pa no depende solamente riba turismo, for di 2019 gobierno a laga traha un rapport cu tin seis diferente sector cu ta prometedor cu por diversifica. Entre nan tin por ehempel e industria creativo, e industria di conocemento, e industria di logistica, agricultura y tambe parti di economia circular y den turismo tambe tin algun niche cu por explora.

El a indica di e seis aki a cuminsa caba cu e parti di agricultura y sector creativo. El a menciona cu segun expertonan e realidad ta cu pa bin cu otro industria e ta tuma probablemente 10 aña prome cu por setup full un industria nobo.

Den e tema di enseñansa, un punto cu a bin dilanti ta e hecho cu di e 100% di studiantenan cu bay studia na Hulanda, solamente 25% ta termina nan estudio. Un cifra hopi alarmante. Parlamentario y candidato di partido MAS Aquannette Gunn, ken tin background den enseñansa, a indica cu como pais Aruba tin e obligacion pa e preparacion pa e futuro studiantenan cu ta opta pa bay studia den exterior.

El a splica cu tin cu prolonga e preparacion aki mas. El a sigui splica cu e sistema cu Aruba tin aworaki, e preparacion di e studiante ta hopi cortico y no ta paso e studiante tin 17 of 18 aña e ta sigur caba ki profesion e kier sigui den dje.

Gunn a enfatisa cu si cuminsa duna e preparacion aki dos aña prome cu e studiante yega su examenjaar por aumenta e porcentahe di e studiantenan cu ta finalisa nan estudio.

El a señala cu e parti di structura den e scolnan mester intensifica esaki pasobra den scolnan secundario tin un decano cu tin un rol sumamente crucial den e parti di escogencia di posibel carera cu e studiantenan ta desea di sigui.

Gunn a enfatisa cu mester traha riba un miho structura, mas intensivo prome cu e studiantenan aki dicidi di subi un avion bay studia bay exterior.

Otro topico cu a bin dilanti ta e tema di corupcion. Durante e ronde di pregunta na un lider di partido, parlamentario Miguel Mansur y lider di partido ACCION21 a puntra e prome minister demisionario mirando e casonan di corupcion alrededor di su partido, ki stap e institucion a tuma of ta bay tuma pa evita cu esaki ta ripiti.

Refiriendo na e mesun pregunta aki durante su declaracion na prensa, Mansur e enfatisa cu e ta un situacion inaceptabel cu no ta limita na un partido so, pero loke ta remarkabel p’e ta cu despues di tanto incidente den e mesun organisacionnan politico no ta haci cambio y mitiga.

El a indica cu te dia di awe na parlamento no a haya ningun iniciativa di ley of cambio di Constitucion pa atende cu parlamentarionan cu ta condena of bao sospecha.

“Luga di haci politikeria riba e asunto bin cu accion, esey ta loke nos a demostra cu tres iniciativa di ley y un na caminda. Realmente mi ta kere ora tin incidente asina loke pueblo kier wak ta kico ta cambiando den e organisacion politico pa mitiga loke a sucede,” el a splica.

Teniendo e tema di corupcion den mente, a puntra e parlamentario si tin algun partido cu tin ideologia asina diferente na esun di su partido cu no lo sinta cune den caso cu mester forma un coalicion. Mansur a indica cu semper ACCION21 ta purba busca loke e partidonan ta di acuerdo cu otro den dje.

“Apart di e variacion den ideologia, mi ta kere nos tur por ta di acuerdo cu nos kier e miho enseñansa posibel, nos tur por ta di acuerdo cu nos kier e miho nivel di salubridad posibel, miho cuido pa nos grandinan, e miho infrastructura posibel. Aunke tin variacion di ideologia mi ta kere mester purba busca similaridadnan y tanten cu e partido ta dispuesto di traha di forma honesto y transparente pa e bienestar general pa tur Arubiano por biba miho, e diferencianan ey ta brugnan cu por crusa,” el a enfatisa.