Pa un famia tin un bon conocemento pa tin un maneho financiero exitoso na cas ta hopi importante, ya cu esey ta implica un miho distribucion di e placa cu ta drenta. Ta p’esey cu Ministerio di Asuntonan Economico y Fundacion Plan di Bida ta bezig cu e curso “Finanzas den mi Hogar”.
Riba rednan social por a mira cu for di algun dia pasa, Ministerio di Asuntonan Economico conhuntamente cu Fundacion Plan di Bida a duna di conoce un curso tocante finanzas denomina “Finanzas den mi Hogar”, pa siña tin un miho maneho di recursonan den hogarnan di Aruba y crea conscientisacion riba e parti aki.
Pa cu esaki, redactor di Bon Dia Aruba a entrevista Giovanni Ridderstaat, ken ta fungi como advisor di estudio di Development Economist cerca minister di Asuntonan Economico, Comunicacion y Desaroyo Sostenibel, Geoffrey Wever.
For di 14 di november di e aña aki e curso aki a cuminsa den districto di Paradera. E curso ta consisti di cuater sesion, den e prome sesion ta papia con cada hende den su cas ta efectivo, con e persona por spaar y tambe e personanan den cas por cumpra sin emocion. Den e di dos parti ta trece dilanti con por paga debenan, kico ta pasa ora un persona no por paga su debenan mas y e proceso cu ta cuminsa. Den e di tres sesion ta papia di inversion den futuro y con por logra metanan. Den e di cuater sesion ta papia riba e presupuesto, con por presupuesta tur luna, kico ta luho y kico ta prioridad segun e entrada, pa asina logra e metanan cu cada hogar ta pone pa su mes.
Ridderstaat a splica cu durante un periodo di un aña e curso aki ta bay ta den tur districto di Aruba, unda cu despues di Paradera e ta bay ta na otro districtonan. El a señala cu e motibo di pakico e curso a bini ta pasobra tin un sondeo di Banco Central di Aruba cu a tuma luga na juli 2021 riba e bienestar financiero di hogarnan, cual a mustra cu den cada 10 hogar na Aruba, 3 ta gasta mas di loke ta haya di entrada. “Esaki ta pone cu e hogarnan ta cay den un situacion financiero precario, vulnerabel y hasta bo bida ta cay den debe. Minister Wever como minister di Asuntonan Economico, pero tambe di Desaroyo Sostenibel, ta wak como su meta cu cada ciudadano mester por participa den sociedad, no solamente riba mercado laboral of scol, sino forma parti di economia”, el a bisa.
Desaroyo sostenibel ta basa riba e principio cu cada ciudadano mester por participa den economia, pero como ciudadano tambe tin e rol di consumidor. “Esaki ta un meta strategico di minister Wever pa e consumidor mester ta consciente pero tambe critico pa ora ta cumpra producto e sa kico ta cumpra y pakico e ta cumpr’e”, el a menciona.
Den e mesun sondeo aki di Banco Central di Aruba a mustra cu ta existi un patronchi di gasto, unda tur luna tin cu cumpli cu hipoteca, huur, cuminda, coriente, awa, transporte, etc. Cada hogar tin un patronchi di gasto y un entrada, door di e sondeo aki a mustra cu personanan ta biba cu mas gasto cu nan mesun entrada. “Eynan minister Wever a wak cu e por influencia y duna un apoyo na e hogarnan, di traha riba nan habilidad y bira financieramente mas consciente di su decisionnan”, Ridderstaat a señala.
El a enfatisa cu esey tambe ta un motibo pa haci e curso, cu educacion financiero ta hopi importante unda cu a traves di esaki por facilita e ciudadanonan den nan rol como consumidor pa haci decisionnan mas saludabel cu lo tin un bon impacto en general, pero tambe riba e persona su mesun hogar y asina riba henter comunidad.
E curso aki tin un duracion di cuater siman, cada siman tin un sesion caminda Ministerio di Asuntonan Economico conhuntamente cu Fundacion Plan di Bida ta bay duna apoyo na e ciudadanonan cu tin interes pa haya mas conocemento. Manera Ridderstaat a comenta caba ora el a papia tocante presupuesto, el a sigura cu “presupuesta ta un habilidad, e ta un disciplina, no ta algo cu ta facil. Bo tin un tiki stress na trabao pa core cumpra algo cu por ta no ta pas den bo budget, por ta bay cumpra algo cu por ta bo no tabata mester, pero e ta kita bo si di logra un maneho sostenibel den bo cartera.”
Ademas, el a sigura cu nan como ministerio ta haya cu henter Aruba mester haya e curso aki y pa e motibo ey nan ta bay ofrece esaki na tur districto y asina duna apoyo na educacion financiero di e isla.
E curso tin un capacidad pa 50 participante den cada districto y e ta gratis. Den total ta 300 persona cu ta bay siña un tiki mas con por tin un maneho financiero mas stabiel den nan cas.
E iniciativa aki a wordo aproba tambe den Conseho di Minister cu a mira e importancia di educacion financiero y ta p’esey cu e curso ta gratis, pa motibo cu ministerio di Asunto Economico ta esun cu ta financia esaki y na final tur participante lo haya un certificado.
E di tres sesion a cuminsa caba na Paradera dialuna ultimo, segun loke Ridderstaat a informa y dia 5 di december tin e ultimo sesion y lo tin entrega di certificado. “E interes t’ey. Pa e parti di debe tabatin hopi pregunta di cursista cu nan no sa kico ta stapnan cu tin cu pasa despues cu bo no por paga bo debe. Y parti di e proyecto ta tambe cu den e cuatro siman di e curso ta bay evalua con el a bay, cuanto hende a participa, kico ta e feedback pa asina ey nan por adapt’e si lo ta e caso y haci’e miho pa e siguiente districto”, el a finalisa.
