Den nos ultimo edicion di Editorial nos a dedica atencion na e complicacionnan di e eventual cambio den e manera di elegi e candidatonan riba lista pa bay den parlamento. Esaki tumando como punto di salida e cambionan proponi den e ley di iniciativa di miembronan di e partido grandi den coalicion. Pregunta cardinal tabata si e cambio, pa e personanan cu mas voto haya asiento den parlamento, eventualmente promer cu esnan cu ta mas halto riba lista, ta conveni e partidonan mes. Loke ta parce un bentaha pa loke ta ‘representacion democratico’, respondiendo na e ‘sagrado voz di pueblo’, por resulta un desbentaha pa maneho di e partido politico mes, pasobra nan ta perde parcialmente e control cu nan tin riba e composicion di nan fraccion den parlamento.
Den e edicion aki atencion pa un otro aspecto di e cambionan reciente proponi, y eventualmente efectua, den e ley di Eleccion. Esaki ta e cambio cu a trece recientemente den e e ley, cu a duna bida na control riba financiamento di partido politico. E cambio aki enberdad ta defini un supervision pa e administracion financiero di e partidonan politico, pero den practica no ta significa nada. Esaki pasobra a dicidi di pone e control riba e administracion financiero den man di Conseho Electoral, cu absolutamente no ta dispone di un aparato administrativo. Den tempo di eleccion e Conseho ta traha den bon coordinacion y cu apoyo di Censo, pero e miembronan di e Conseho no tin apoyo administrativo propio. Awor, e filosofia di esnan cu a tuma e iniciativa pa e ley ta parce di ta: “loke no tin bor bini ainda”, indicando e posibilidad pa e Conseho haya e aparato necesario. Esaki pa varios motibo ta completamente ilusorio. Uno ta cu nos ta bibando den tempo di escasez y austeridad, unda gobierno mester busca manera pa haci mes hopi trabao cu menos hende. Ya caba nos tin e gastonan extra di e oficina di Ombudsman cu ta menasa di keda na mitar di caminda pa falta di recurso pa institui esaki. Pero no ta solamente cu lo mester bay crea un aparato totalmente nobo pa e Conseho Electoral, ta trata tambe di contrata cuadronan profesional cu ta scars caba den gobernacion. Por ehemplo accountant y otro personal altamente califica cu na e momento aki un servicio clave manera Centrale Accountantsdienst mes no tin suficiente.
Ademas e tarea di core tras di e partidonan pa controla nan finanzas por trece cierto conflicto, real o ficticio, entre un o mas partido politico y e Conseho. E responsabilidad maximo pa e supervision lo ta den man di e presidente di Conseho Electoral, e mesun persona cu mester huzga den caso di cierto problema o conflicto, tanto den campaña como den eleccion, inclusive certificacion di resultado electoral. Ta facilmente imaginable cu, mientras campaña o eleccion ta andando, tin simultaneamente un investigacion contra un cierto partido. Esey por resulta di biaha den acusacion di parcialidad di e Conseho Electoral, loke ta haci daño na e imagen di imparcialidad y integridad cu e Conseho mester por tin y conserva. Esaki ta e productonan putri promer cu nan a hecha, di hende cu ta kere cu pasobra nan tin un asiento den parlamento, esaki ta suficiente base pa legislacion solido, cu berdaderamente ta yuda nos bay dilanti como pais.
Lo no tabata logico pa deposita e tarea di control cerca otro instancia, manera Contraloria General, apoya pa Centrale Accountantsdienst, cu ya caba ta dispone di e aparato di control financiero? Esaki di biaha tambe lo a kita e problema di conflicto di tarea pa e Conseho Electoral, cu lo por sigui cu su trabao pa unico y exclusivamente percura pa e pais tin eleccion limpi, transparente y husto, di manera cu independiente di con e resultado ta, tur hende por cta di acuerdo cu esey. Pues cu e ‘move sabio’ cu aparentemente e iniciadornan di e ley kier a trece, a haci daño dos biaha: a introduci un control cu no ta bay funciona, pa motibonan practico, y ademas a trece un cierto ‘contaminacion’ den e tarea di e Conseho, cu por conduci na desprestigio di e Conseho di parti di cualkier partido cu ta bao di supervision y pa su conveniencia ta acusa e Conseho di ta trat’e inhustamente, pa supuesto motibo politico. Nos ta biba den un sociedad chikito unda ta dificil evita semper encuentro o confrontacion en persona. Ta p’esey’ den pasado esnan cu a crea e ley original tabatin e sabiduria pa pone nombramento di e presidente den man di Presidente di Corte di e Islanan, sin interferencia politico di ningun banda.
Nos no ta bay asina leu di sugeri cu e cambionan deficiente aki a ser haci a proposito, pero cu si tin como resultado cu nos ta awor den un aña electoral, y cu despues di decadas di ausencia di un supervision financiero, awor nos ta keda confronta cu algo cu absolutamente no ta sirbi. E uniconan cu a sali di bon den esaki, ironicamente, ta e partidonann politico mes, cu no mester preocupa pasobra no lo tin supervision di nan finanzas den e campaña actual y eleccion venidero, pasobra di baina gobierno lo tin placa pa paga organisacion di eleccion mes, mucho menos pa paga supervision.
