Financiador confiable? Nos por haci miho trabao…

Den e edicion aki di Bon Dia Aruba ta aparece dos articulo relaciona cu e proyecto hotelero na Sero Colorado. Un ta trata un di e personanan di exterior cu a bira director di e compania local cu tin e proyecto. Den pasado tambe e tabata obheto di comentario menos positivo di den comunidad.

E otro ta trata di e compania estableci na Londres, Reino Uni, cu segun informacion divulga localmente lo keda encarga cu provision di e capital necesario. Den ambos caso nos a reuni informacion cu nos por a haya, pa por evalua si esaki ta e partnernan confiable y solido cu Aruba lo ta buscando pa yuda genera desaroyo economico. Nos tin nos propio pensamento encuanto esaki. Pa cuminsa e persona en cuestion. Den e ultimo añanan a aparece hopi informacion tocante e persona riba internet, unda tin un cantidad impresionante di website y blogsite di oposicion Venezolano, cu ta trece e persona di tal nomber den relacion cu varios otro persona, cu ta ser acusa di delito grave, manera corupcion, narcotrafico, labamento di placa, etc. Sin embargo, manera nos a informa na mei 2015, tempo cu e persona aki tabata relaciona cu e peticion di cuminsa un hotel na Isla di Oro, a bin casi e mesun avalancha di informacion negativo dilanti, cu a conduci na un investigacion di ministerio publico, cu e resultado cu te na e momento ey nan no a haya nada den sentido negativo di e persona. Despues e caso a manera muri.

Actualmente, cu e reaparicion di e persona como director di e compania local Three Rivers Real Estate, e fluho di informacion negativo a bolbe surgi. Sin embargo, den tur esaki nos mester mantene obhetividad. Den nos buskeda di informacion nos no a topa cu denuncia o accion hudicial concreto contra e persona. Esaki tin cierto logica pasobra loke e persona tabata haci, ta intermediacion financiero cu tabata trece su persona den contacto cu e poderosonan di e imperio dictatorial di Chavez/Maduro/Cabello. Como representante o testaferro no necesariamente bo ta e prome persona pa ta den e ‘line of fire’ hudicial. Tanten nos no a mira prueba di su participacion den delito, nos no ta bay expresa cos cu nos no por proba. Ta keda naturalmente e problema di reputacion, cu no tin di haci estrictamente cu envolvimento directo cu crimen. Anda cu hende robes ta prueba di mal huicio.

E otro banda di e asunto, cu tambe nos a investiga, ta e compania Connected Capital estableci na Londres, di cual e persona aki, en todo caso uno di mesun nomber, tabata un gerente, te na su salida na 2017. Den e caso di e compania tin completamente otro aspecto ta hunga un papel. Na prome lugar Aruba mester por confia cu ta trata di un partner serio, ya cu pa hopi aña gobierno lo mester deal cu nan. Nos tabatin demasiado fracaso riba nos record pa loke ta proyecto hotelero pa nos no a siña nos les. Y nos ta haya cu den e caso concreto aki, ta keda bastante pregunta pa contesta. Por ehemplo, gobierno a haci un debido screening di e estado financiero di e compania aki? Si esey ta asina, nan lo mester a topa cu e mesun informacion financiero cu e compania a deposita cerca e registro publico mercantil na Londres, cu nos tambe a consulta.

Tin un diferencia hopi grandi entre e pantaya bunita cu e compania aki ta duna di su mes riba internet, unda nan ta presenta nan mes como un compania fuerte cu ta yuda otro empresario cu e financiamento cu nan mester pa inverti. Esey ta dificil pa realisa cu un balance sheet di menos di 50.000 dollar na capital inverti. Ademas e compania mes a solicita e status di ‘small company’ pa no mester presenta un cuenta anual completo manera exigi di compania grandi.

Esey ta trece nos riba e siguiente posibilidad y esey ta cu nan ta sirbi solamente como intermediario financiero. Den e caso ey ainda nos no tin ningun bista riba ken ta e berdadero financiadornan, cu no kier revela ken nan ta? Nos ta papiando transparencia? Mester tuma na cuenta cu nos no ta trece tur esaki dilanti pasobra nos tin nos pensamento tocante e proyecto. Ta e gobierno aki mes a bin dilanti cu un maneho unda integridad y transparencia ta hunga un papel central. Hopi hende, nos por bisa un gran mayoria di e pueblo aki ta aplaudi esey…, pero e ora mester cumpli tambe, pa nos proteha nos mes contra malora.

Den e contexto aki ademas nos mester tene masha cuidao cu tur loke tin di haci cu Venezuela. Na e momento aki di un banda por tin intento pa saca placa horta di pueblo for di e pais, y di otro banda nos tin e intentonan di Merca pa para mas tanto posible cu placa ta bay den man di esnan cu no mester haya esaki. Esey ta trece un extra responsabilidad pa nos, sin cu nos ta na nivel di acusa hende. Si nos kier proba cu nos no ta merece di ta riba e blacklist di Union Europeo, nos mester cumpli cu mas cos cu solamente cambia ley.