Despues di un procedura legal cu a dura mas cu 13 aña, corte a dicta na fabor di e ex empleadonan di Setar. Diabierna Conseho di Minister a aproba e ley pa efectua e pago na ex empleadonan/ E ley ta na caminda pa parlamento.
Na momento cu a independisa Servicio di Telecomunicacion di Aruba na aña 2003 mas cu 90 empleado a haci uzo di e afvloeiingsregeling den un plan social conveni durante e transicion pa Setar. E mesun tempo a surgi un disputa entre e ex empleadonan, sindicatonan y Pais Aruba riba e base salarial di e afvloeiingsregeling.
E veredicto di corte a menciona solamente un grupo di 32 ex empleado, pero a base di esaki por conclui cu e demas ex empleadonan cu a haci uzo di e afvloeiingsregeling e tempo ey lo wordo otorga e mesun derechonan. “Gobierno di Aruba a tuma e decision di principio cu lo paga tur ex empleado cu a haci uzo di a afvloeiingsregeling bou di e mesun condicionnan”, minister Richard Arends titular di Asuntonan Economico y Comunicacion ta splica.
Segun e mandatario awor a caba cu un disputa hopi largo. Un disputa cu a surgi durante gobernacion di aña 2003 y cu a causa hopi iritacion, frustracion y indignacion cerca e ex empleadonan di Servicio di Telecomunicacion di Aruba.
