Joran van der Sloot, sospechoso principal den e desaparicion di Natalee Holloway na 2005, a admiti cu el a bati e hoben di Alabama te na su morto na un lama di Aruba despues cu el a nenga su avancenan sexual.
Associated Press (AP) ta reporta e detayenan nobo den e asesinato di Natalee Holloway cu a sali na cla ayera diaranson ora cu van der Sloot a declara su mes culpabel di extorsiona e mama di Holloway, resolviendo asina un caso cu a capta e atencion di publico y casi mundo henter casi 20 aña pasa.
Aunke van der Sloot no a wordo acusa pa e asesinato di Natalee Holloway, su intento pa saca un cuarta parti di un miyon di dollar for di e mama di e hoben cu a wordo asesina na 2005, Beth Holloway, a duna e investigadornan un vinculo crucial na su asesinato. Finalmente e famia por tin clausura na e incertidumbre cu nan a biba cune pa casi 20 aña.
“Te cu misa, el a caba,” Beth Holloway, mama di Natalee a bisa reporteronan pafo di e corte federal na Alabama. “Joran van der Sloot no ta e sospechoso mas den e caso di asesinato di mi yiu. E ta e asesino.”
Natalee Holloway a disparce durante un biahe di graduacion cu su compañeronan di scol. El a wordo mira ultimo biaha dia 30 di mei 2005, saliendo for di un bar cu van der Sloot. El a wordo cuestiona ariba su vinculacion cu e desaparicion di Natalee pero nunca a wordo sentencia. Despues di algun aña un hues a declara Natalee Holloway oficialmente morto, pero su curpa nunca a aparece.
Aworaki, casi 20 aña despues, el a declara su mes culpabel di e cargonan di extorsion y fraude a cambio di un sentencia di 20 aña di prizon cu e lo sirbi na mesun momento cu e sentencia di 28 aña cu e ta sirbiendo actualmente na Peru pa e asesinato di Stephany Flores na 2010.
Van der Sloot, cu su man na boei y cu un uniform di prizon oranje a bisa e corte cu e ta spera cu su confesion por trece clausura.
“Mi kier tuma e oportunidad pa pidi pordon na e famia Holloway, mi mesun famia,” el a bisa. “Mi no ta e mesun persona cu mi tabata e tempo ey,” el a agrega.
Den un entrevista conduci pa su abogado, el a bisa cu su persona y Holloway tabata na lama ta sunchi. Holloway a cuminsa resisti, pero el a sigui mishi cun’e y Holloway a scop e memey di su pia. El a lanta y a scop Holloway “sumamente duro” den su cara mientras Holloway tabata drumi ainda.
Na e momento ey, el a bisa, Holloway tabata inconsciente, posiblemente hasta morto, pero definitivamente inconsciente. El a bisa cu el a coy un bloki di cement y a dal cun’e na su cara.
Spanta y insigur ki pa haci, el a bisa el a lastra e curpa di Holloway te ora e awa di lama tabata na su rudia y el a pusha e curpa den lama.
