Fin di un siman agita; Awor trabao di goberna ta cuminsa

Ayera nochi a conclui un siman bastante agita di tratamento di presupuesto. Desde siman pasa diahuebs nos a repasa un y mas biaha tur e cosnan cu a bay robes den gobernacion anterior, y a repasa tambe tur e asuntonan cu di awor en adelante lo cana miho. Al menos, esey ta e compromiso di e actual coalicion. Cu apenas cinco luna den gobernacion, naturalmente ta duna nan e beneficio di duda.

Esey no ta significa cu ta bay ta facil, ni cu mal custumber di pasado no por bolbe. Ta di spera cu nan mes, gobierno y nan apoyo den parlamento, ta haci loke nan ta priminti. Di tur manera nos no mester di un ripiticion di e fechorianan cometi den e ultimo 8 añanan, y sigur no si nos scucha durante e dianan aki, por ehemplo e sumanan grandi di placa gasta na paga amigonan cu ta bisa cu nan ta experto riba nan tereno, manera mercadeo, acesoria, relacion publico, sin cu den tur caso tin prueba di esaki, y ni den e casonan cu nan ta experto, ainda esey no ta hustifica e pagonan barbaro cu nan tabata haya. Segun relato di prome minister, e gastonan aki a yega na casi 89 miyon florin den ocho aña, mientras cu hopi cos drechi por a haci cu e placa aki.

Esaki ta haci cualkier ciudadano pensa: y tur esaki nan a hacie solamente pa amistad, pa ta bon brother? Of tabatin placa cu tabata bolbe via un otro ruta pa esnan cu a usa placa di nos pa comete e cosnan aki? Esaki ta lansa e pregunta, ta con a para cu e asunto di e ‘screening despues’? Pasobra manera nos a enfatisa na varios ocasion, si ta controla solamente ora ministro y parlamentario ta inicia nan periodo, y no na final, anto bo no tin ningun bista di kico nan a haci o laga di haci. Asina anto nos ta haci e pregunta cu nos no a tende concretamente den e dianan aki: tin un screening posterior? Pa tur?

Mester bisa naturalmente cu a entrega y aproba un mocion pa investiga e iregularidadnan, relaciona cu e maneho  di e anterior ministro encarga cu infrastructura, y di mes caba tin e anterior ministro cu tabata algun tempo cera, pero lo mester ta rutina normal cu tur persona den e posicion di ministro o parlamentario ta someti na un investigacion previo y posterior, sino ta mescos cu nos no haci nada.

Un mocion cu a laga nos un poco confundi ta esun tocante discriminacion y cannabis medicinal. Nos no ta comprende kico esun tin di haci cu e otro, sigur no si e mocion ta boga pa eradica discriminacion di tur forma na henter mundo… Por ta cu nos ta naief, pero no ta miho si nos cuminsa preocupa pa discriminacion aki  y con pa combati esaki? Por ehemplo: con pa controla si hende homber y hende muhe ta haya pago igual, pa trabao igual? Ken mester haci algo concreto al respecto? Cual ta e entidadnan gubernamental cu tin autoridad legal pa haci algo, den sentido di control, eventual sancion? Ta asina mester actua.

Pa loke ta e cannabis medicinal e mocion tabata parce un ‘make up and kiss act’ pa sigura e apreciable miembro di partido RED cu no a lubida e compromiso pa implementa, nada mas. Manera nos a bisa anteriormente caba, tur e trabao pa yega asina leu mester tuma lugar ainda, di tur manera, prome cu cannabis medicinal bira un realidad.

Di ambos banda di parlamento a señala cu entre otro e presupuesto di polis no tabata refleha e deseo y intencionnan. Gobierno a bin cu un nota di cambio, cu ta encera un aumento di presupuesto, di total como 11,5  miyon, principalmente pa polis. Den nos edicion di 20 di april nos a remarca tambe cu en total e presupuesto di polis lo a bay atras cu casi dos miyon florin, compara cu 2017, loke ta contrasta cu e intencion di maneho expresa. Awor tanto oposicion como coalicion por claim cu nan a logra exito cerca gobierno, y nos lo bisa: laga cada un canta victoria. Contal cu e cambio ta ilustra un cos: con dificil ta den practica pa ignora gastonan structural.

Y despues cu nos a scucha y tende tur cos encuanto e presupuesto aki, nos a keda cu e mal sentimento cu atrobe nos ta haci nada mas cu combati sintoma. Tanto den e caso di e inversionnan den husticia y den asunto social nos no ta papia primeramente di prevencion, sino di purba maneha e efectonan manera nan ta manifesta nan mes, pero esey ta ora nan ta un hecho caba. E inversionnan cu nos mester bay mira den futuro mester ta dirigi hopi mas riba e proyectonan cu ta encera prevencion, manera un expansion considerabel di e proyecto Traimerdia, cu den e ronda aki ta haya apenas un poco menos di 200.000 florin compara cu 2017, un señal cu ta anticipa nada mas cu un aumento di gastonan rutinario, y no di magnitud di e proyecto. Di e manera aki, si no bin cambio, nos ta keda core tras di e echonan.