(AFP)—Donatella Versace ta entrega e control creativo di e marca luho di moda “Versace” despues di casi tres decada, segun a anuncia ayera. Esaki ta marca e fin definitivo di e control di su famia riba e marca funda pa su ruman Gianni, ken a ser asesina.
E icono di moda Italiano cu su cabey platinum y ken lo cumpli 70 aña den mei, lo ser substitui pa Dario Vitale, director di diseño di Miu Miu. Hopi experto den e industria ta considera esaki como un posibel paso na un futuro adkisicion di Versace pa su rival mas grandi, esta Prada, cu ta e doño di Miu Miu tambe.
E rol nobo di Vitale como director creativo principal – un diseñador respeta pero relativamente desconoci cu a logra un aumento di bentanan impresionante na Miu Miu – ta representa un punto di transformacion pa e marca Versace, cu a ser funda na 1978 pa Gianni Versace.
E marca popular y famoso pa su logo di Medusa a supera hopi subida y caida den e mundo di moda, pero semper tabata un Versace cu tabata dirigi e filosofia y vision di su diseño yamativo y atrevido.
Donatella Versace lo bira embahador principal di e marca cuminsando 1 di april, mesun dia cu Vitale lo tuma e posicion di director creativo, segun Capri Holdings Limited a anuncia, e compania doño di e marca.
“Tabata e honor mas grandi di mi bida pa sigui cu e legado di mi ruman Gianni. E tabata e berdadero genio, pero mi ta spera cu mi a hereda un tiki di su spirito y determinacion,” Donatella Versace a bisa.
E diseñador, ken a tuma su saludo na e fin di e desfile di Milan Fashion Week luna pasa, a agrega cu e lo keda “e sostenedor mas apasiona” di e marca.
Como director di diseño di Miu Miu – e linea mas hubenil di Prada – Vitale a lidera un crecemento di 93% den bentanan di e marca aña pasa, den un mercado conoci pa ta dificil pa nabega pa moda di luho.
El a bisa cu Versace tin “un herencia unico cu a sobrepasa decadanan y a forma historia di moda.”
‘Novedad y sorpresa’
Grupo di moda Capri Holdings, cual tambe ta doñonan di Jimmy Choo y Michael Kors, ta e doñonan di Versace desde 2018, pero a lucha pa solidifica e posicion di e marca di luho, cu bentanan cayendo 15% den su ultimo tres mes.
Segun reportahenan, Prada ta den negociacion avansa pa cumpra Versace, y Bloomberg a reporta anteriormente cu e transaccion por yega casi 1.5 biyon euro ($1.6 biyon).
Ehecutivonan di Prada no a duna ningun comentario publico tocante e posible negociacion cu Versace. Presidente di Prada, Patrizio Bertelli, a bisa luna pasa cu e ta “masha cauteloso” tocante cualkier tipo di adkisicion.
Segun analista di Bernstein, Luca Solca, e reorganisacion creativo por ta “bon noticia” pa Versace.
“Incluso e mihor diseñadornan – manera tur artista – ta bira predecibel cu tempo,” Solca a bisa.
“Y predecibel no ta suficiente den un mercado unda e marcanan ta competi pa atencion di consumidornan cu novedad y sorpresa.”
Musa y empresario
Como un di e figura mas reconoci den moda, cu su cabey blond platinum y su preferencia pa sapato halto, Donatella Versace a pasa gran parti di su hubentud como musa personal di su ruman Gianni, cu a ser asesina na 1997.
E morto di Gianni a lansa Donatella, e mas chikito di e rumannan Versace, na e liderazgo di e imperio di moda familiar. Sin ningun formacion oficial den diseño, na su edad di 42 aña, el a bira e diseñador creativo principal di e marca.
Algun di e diseñonan mas iconico di Versace – manera e shimis berde cortico cu Jennifer Lopez a bisti na e Grammy’s di 2000 – tabata resultado di e decisionnan atrevi di Donatella y su habilidad pa atrae celebridadnan na e marca.
Como embahador di e marca, Donatella lo enfoca mas riba trabao filantropico y caritativo di e compania.
Despues di un periodo di benta y restructuracion, Capri a cumpra e empresa pa 1.83 biyon euro den 2018.
Awor Versace no ta solamente moda y acesorio, pero tambe tin linea di articulonan pa cas y hotel. E tin 230 boutique rond mundo y mas di 400 tienda cu licencia.
Prome cu e anuncio ayera, hopi den e industria tabata considera Vitale como un candidato pa dirigi Gucci, despues cu Gucci a despedi di Sabato de Sarno den februari, despues di solamente dos aña den e posicion.
