Fin di siman tabata uno unda varios suceso impactante a tuma lugar, entre nan, dos persona fayecido den diferente situacion y otro cu pa diasabra ultimo tabata den estado critico na Hospital.

Segun varios comunicado di prensa di Cuerpo Policial di Aruba, diasabra madruga pa 2:58am central di polis a ser informa door di Alarma Central cu lo mester tin un caso di tiramento na altura di Tio Pepe bar & restaurant na Pos Chiquito.

Patruya ta yega cu maximo urgencia na e sitio y a bin encontra cu un auto Mini Cooper destrui. Pero no ta topa cu ningun persona. Patruya a controla na e sitio y un den cercania bin topa cu huls.

Departamento di recherche di San Nicolas como tambe polis tecnico a presenta na e sitio pa haci nan investigacion.

Un rato despues central di polis ta wordo informa cu un persona lo a yega hospital cu herida di tiro na su curpa.

Ta trata di victima di inicial fam M. di 17 aña di edad. Pa diasabra ultimo e situacion di e victima tabata critico y e caso na e momento aki ta bao investigacion.

Homber a cay for di dos piso na Malmok

Den un otro suceso, diasabra mainta pa 10:15 central di polis a wordo informa di un caso na Malmok na unda un persona lo a cay for di dos piso na un condominio den construccion.

Patruya a yega na e sitio como tambe ambulance. Personal di ambulance a trata e persona, pero no por haci mas p’e. Pa 11:50 Dr. Texier a constata morto di e homber R.L. nacionalidad dominicano di 44 aña di edad.

Recherche a presenta na e sitio y polis tecnico pa haci nan investigacion.

Turista ta hoga na Arashi

Ayera diadomingo, Cuerpo di Polis a informa cu mainta pa mas o menos 9:23 central a haya notificacion cu un hende homber lo a haya problema den lama y su yiu a sak’e y trec’e na cant,o na unda a cuminsa cu re-animacion.

Polis a ser despacha na e luga como tambe personal di ambulance.

Na yegada di polis a topa cu e situacion lamentabel, personal di ambulance a presenta y a purba brinda yudansa na e persona, pero lamentablemente no por a haci nada mas p’e.

Pa 10:42 Dr. Mungra a constata morto di e turista A.P. naci na Polonia di 64 aña di edad.

Slachtofferhulp a presenta na e sitio pa asina guia e famia den e momento dificil aki.