Den un comunicado di Departamento di Salud Publico a keda conoci cu e fin di siman aki, diasabra dia 11 y diadomingo dia 12 di september, atrobe Ritz-Carlton ta habri su portanan pa yuda organisa un otro Vacunathon.
Nan a splica cu riba e dos dianan aki, Departamento di Salud Publico lo ta dunando e di 2 dosis na tur esunnan cu 3 siman pasa durante e Vacunathon number 3 a ricibi nan prome dosis y tambe DVG lo ta ofreciendo e prome dosis na tur persona cu ainda no a vacuna.
Durante e Vacunathon lo tin e posibilidad pa scoge entre e vacuna di Johnson & Johnson of Pfizer.
E vacuna di Johnson & Johnson por wordo aplica unicamente na ciudadano di 18 aña of mas, no ta recomenda pa duna hoben bou 18 aña Johnson & Johnson. Pa e motibo aki, hobennan ta ricibi Pfizer.
Hende muhe na estado of cu ta dunando lech’i pecho tambe ta wordo recomenda pa vacuna pa evita complicacion y pa brinda proteccion na e baby cu no a nace ainda of cu ta bebe lech’i pecho.
Di otro banda, nan ta informa tambe cu remedinan antibiotica no ta yuda Covid-19 manera algun personanan den comunidad ta kere.
Nan a expresa cu antibiotica no tin ningun tipo di efecto riba e virus Covid, ni contra ningun otro tipo di virus. Antibiotica ta un medicamento efectivo contra infeccionnan bacteriologico, no viral.
Asina mes, a indica cu no tin ningun medicamento specifico cu a demostra ainda di ta efectivo contra e virus aki. Pa personanan por combati Covid mester mantene un bon salud y vacuna, ya cu segun nan ta sigura, vacuna tin un efectividad halto pa proteha e personanan.
